Detaje të reja janë bërë publike lidhur me ngjarjen tragjike ku humbi jetën kapiteni 51-vjeçar Arben Anamali, ndërsa po shpëtonte dy turistë izraelitë në Liqenin e Shkodrës.
Sipas informacionit të mbledhur nga Policia e Shkodrës dhe dëshmive nga vendi i ngjarjes, atë ditë Anamali po kryente lundrimin e zakonshëm turistik me anijen e bashkisë, ku ndodheshin pesë turistë izraelitë.
Gjatë lundrimit, disa prej tyre u hodhën papritur në ujë, duke mos respektuar urdhrin e kapitenit për të mos u zhytur për shkak të rrymave të forta në zonë.
Kapiteni, i alarmuar nga rreziku, hodhi menjëherë jelekët e shpëtimit, përfshirë edhe atë të tijin, drejt tyre dhe u hodh në ujë për t’i ndihmuar. Ai arriti t’i afronte pranë anijes dhe t’u shpëtonte jetën, por më pas nuk u pa më në sipërfaqe.
Dyshohet se kapiteni pësoi arrest kardiak për shkak të lodhjes së madhe dhe stresit fizik.
Pas 48 orësh kërkimesh intensive, trupi i tij u gjet nga forcat e kërkim-shpëtimit dhe u dërgua në morgun e spitalit rajonal të Shkodrës, ku pritet kryerja e ekspertizës mjeko-ligjore.
Turistët izraelitë, pas dhënies së dëshmive në polici, janë larguar drejt Tiranës. Ata pranuan se kishin hyrë në ujë pa lejen e kapitenit dhe kishin injoruar paralajmërimet e tij për rreziqet.
Arben Anamali, baba i dy fëmijëve, punonte çdo ditë me anijen turistike që shërbente komunitetin dhe vizitorët e zonës. Humbja e tij ka tronditur thellë banorët lokalë, të cilët po përgatiten të nderojnë sakrificën e tij heroike.
