Gjykata e Apelit të Posaçëm ka vendosur të lërë në fuqi masën e sigurisë “arrest me burg” për kreun e Partisë së Lirisë, Ilir Meta.
Vendimi erdhi pas shqyrtimit të ankimimit të paraqitur nga Meta kundër vendimit të Gjykatës së Posaçme të Shkallës së Parë të datës 26 qershor, që e mbajti në paraburgim.
Pavarësisht pretendimeve të mbrojtjes për zëvendësimin e masës me një më të butë si “arrest në shtëpi” apo “detyrim për paraqitje” Apeli konfirmoi vendimin e mëparshëm.
Para nisjes së seancës, avokati i Metës, Kujtim Cakrani, në një deklaratë për mediat u shpreh me tone ironike: “Patjetër që do lirohet, e ka thënë Ajatollahu sot, do ta lirojmë”.
Meta ndodhet në paraburgim që prej 21 tetorit 2024 dhe së fundmi ka depozituar edhe një kërkesë në Gjykatën Kushtetuese, duke kundërshtuar vendimet e tre gjykatave, të Shkallës së Parë, Apelit dhe Gjykatës së Lartë, si antikushtetuese.
Sipas tij, këto vendime bien ndesh me Kushtetutën dhe Konventën Europiane për të Drejtat e Njeriut, pasi ai mbahet në burg pa u përballur me një akuzë formale.
Gjatë seancës në Apel, mbrojtja kërkoi zbatimin e një prej shtatë masave alternative ndaj arrestimit me burg, duke përmendur: arrest në shtëpi, garanci pasurore, ndalim të daljes jashtë shtetit dhe detyrimin për t’u paraqitur në polici.
Në seancë ishin të pranishëm edhe dy prokurorët e SPAK-ut, Arben Kraja dhe Sotir Kllapi.
Ilir Meta dhe ish-bashkëshortja e tij, deputetja Monika Kryemadhi, janë marrë të pandehur nga SPAK për një sërë veprash penale, përfshirë korrupsionin, pastrimin e parave dhe mosdeklarimin e pasurisë.
Sipas hetimeve, ata dyshohet se kanë përdorur pozitat e tyre publike ndër vite për të favorizuar kompani të caktuara dhe për të përfituar shuma të mëdha parash nëpërmjet lobimeve dhe shitblerjes së pasurive të paluajtshme, të cilat nuk janë deklaruar në ILDKPI dhe KQZ.
Monika Kryemadhi, aktualisht, është nën masën e sigurisë “detyrim për t’u paraqitur në policinë gjyqësore”, e vendosur nga gjykata më 23 tetor, për të njëjtat akuza.
E njëjta masë është vendosur edhe për Ema Çoku, ndërsa Piro Xhixho, i akuzuar për korrupsion pasiv, ka pasur një ndryshim të masës nga “arrest në shtëpi” në “detyrim për paraqitje”.
Të gjithë të hetuarit nën këtë masë janë të detyruar të paraqiten një herë në muaj pranë Policisë Gjyqësore të SPAK.
