Kreu i Grupit Parlamentar të Partisë Demokratike, Gazment Bardhi, ka reaguar pas vendimit të Gjykatës së Apelit për pezullimin e dënimit që përjashtoi disa deputetë të PD-së nga jeta parlamentare. Bardhi e ka cilësuar këtë vendim si një konfirmim të betejës së deputetëve të opozitës për të rivendosur kushtetutshmërinë dhe rendin në Kuvendin e Shqipërisë.
Ai ka akuzuar kryetaren e Kuvendit, Elisa Spiropalin, dhe shumicën për shkelje të Kushtetutës, duke e quajtur Kuvendin një “çerdhe paligjshmërie”, ku, sipas tij, vepron forca e arrogancës dhe shkelja e rregullave demokratike. Bardhi ka kritikuar masat e sigurisë dhe rrethimin e Kuvendit me tela hekuri dhe forca policore, duke theksuar se kjo është një veprim që i përket regjimeve autoritare dhe jo një vendi anëtar të NATO-s dhe kandidat për Bashkimin Europian.
Ai ka theksuar se ky është rasti i parë në histori që deputetët e opozitës dënohen për një rregullore që është shfuqizuar nga Gjykata Kushtetuese, duke injoruar vendimin e saj për të cilësuar masat e përjashtimit si jo proporcionale. Bardhi ka kërkuar përgjegjësi për ata që kanë penguar opozitën të ushtrojë funksionin e saj kushtetues, duke përdorur forcën dhe masa të paligjshme.
