Më 31 janar hyri në fuqi paketa ligjore Anti-Kap Çfarë të Kapësh.
Ky ligj parashikon hetimin e 91 krimeve të parashikuara në Kodin Penal, nga vjedhja me armë, tek droga, grupi i strukturuar kriminal, vrasja, falsifikimet, plagosja, rrëmbimi, prostitucioni, terrorizmi, korrupsioni i çdo zyrtari publik e deri tek krimi zgjedhor.
Policia e Shtetit ka gati listën me 250 subjektet e para ku do ndërhyjnë. (Lexo këtu)
Po ashtu, janë publikuar edhe kategoritë që do kontrollohen nga kjo paketë.(Lexo këtu)
Mirëpo, ky ligj ka hasur në kundërshtime.
12 organizata në vendin tonë u shprehënse miratimi i këtij projekt-ligji cenon parime të rëndësishme kushtetuese.
Po ashtu, organizatat thonë se paketa duhet të ishte miratuar në respekt të plotë të Kushtetutës.(lexo këtu)
Por, çfarë qëndrimi mbajnë BE dhe SHBA mbi këtë ligj?
Ditën e sotme kanë reaguar të dyja institucionet përkatëse.
Delegacioni i BE në Shqipëri me anë të një statusi në Twitter shprehet se vijojnë të inkurajojnë qeverinë dhe do e vëzhgojnë nga afër zbatimin korrekt të paketës.
Statusi në Twitter
“Ndiqni paratë” ka provuar të jetë një mënyrë shumë efektive për të trajtuar konkretisht organizatat kriminale. Ligji special i miratuar nga Qeveria e Shqipërisë që prezanton masa të reja parandaluese për forcimin e luftës kundër krimit të organizuar dhe terrorizmit shkon në këtë drejtim dhe tregon vullnet politik për të adresuar çështjen. Ne do të ndjekim nga afër zbatimin konkret të aktit normativ. Është me shumë rëndësi që masat e reja legjislative të zbatohen me respekt të plotë të të drejtave themelore të të pandehurve dhe në përputhje me parimet e shtetit të së drejtës. Është gjithashtu e rëndësishme që këto masa të reja të ndiqen përmes institucioneve të krijuara nga reforma në drejtësi, në veçanti SPAK.
Ne vazhdojmë të inkurajojmë qeverinë e Shqipërisë që të rrisë më tej përpjekjet e saj për zbatimin e plotë të reformës në drejtësi dhe forcimin e shtetit të së drejtës.
Po ashut, edhe Ambasada Amerikane e cilëson “Anti-KÇK” një ligj me interes të madh dhe shpreh mbështetjen ndaj qeverisë.
DEKLARATË E AMBASADËS SË SHTETEVE TË BASHKUARA MBI LIGJIN ANTI-KÇK
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga Qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor. Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor. Ne do të vazhdojmë ta ndjekim zbatimin e këtij ligji me interes te madh.”
