Dërgesat e emigrantëve vijojnë të jenë një burim kyç financimi për konsumin familjar në Shqipëri, por shumica e tyre realizohen përmes rrugëve informale. Të dhënat më të fundit nga Anketa e Emigracionit tregojnë se 70 për qind e remitancave që vijnë në vend kryhen jashtë sistemit zyrtar financiar.
Sipas anketës, 43 për qind e dërgesave realizohen përmes miqve ose të afërmve që sjellin paratë fizikisht në Shqipëri, 15 për qind përmes sjelljes personale të parave cash nga emigrantët pas kthimit në vend, ndërsa 12 për qind kalojnë përmes ndërmjetësuesve informalë.
Vetëm 30 për qind e remitancave transferohen përmes kanaleve formale. Nga këto, 20 për qind realizohen përmes shërbimeve bankare dhe 10 për qind përmes operatorëve të transferimit të parave. Kjo strukturë tregon peshën ende të lartë të informalitetit në remitanca dhe vështirësitë për formalizimin e plotë të flukseve financiare nga emigrantët.
Remitancat mbeten një burim jetësor për shumë familje në Shqipëri, duke përfaqësuar një pjesë të konsiderueshme të të ardhurave totale. Ky ndikim shtrihet edhe te disa familje jo migrante, çka nënvizon rolin e gjerë të rrjeteve të migracionit në ekonominë familjare.
Të dhënat tregojnë se pothuajse gjysma e emigrantëve transferojnë një pjesë të të ardhurave të tyre drejt Shqipërisë. Vendimi për të dërguar remitanca lidhet drejtpërdrejt me nivelin e të ardhurave dhe kursimeve që emigrantët arrijnë të sigurojnë jashtë vendit.
Megjithëse remitancat përbëjnë një burim të rëndësishëm ekonomik, potenciali i tyre zhvillimor mbetet kryesisht i pashfrytëzuar. Kjo lidhet si me dominimin e kanaleve informale të transferimit, ashtu edhe me faktin se përdorimi i tyre përqendrohet kryesisht te konsumi.
Sipas anketës, rreth gjysma e familjeve të emigrantëve kanë marrë remitanca gjatë 12 muajve para zhvillimit të saj. Për familjet përfituese, transfertat nga jashtë përbëjnë 41 për qind të të ardhurave totale. Emigrantët meshkuj dhe ata në moshë më të madhe kanë më shumë gjasa të dërgojnë remitanca krahasuar me migrantet femra dhe të rinjtë, duke reflektuar norma më të larta punësimi dhe aftësi më të mëdha për gjenerimin e të ardhurave.
Përdorimi i remitancave mbetet i fokusuar kryesisht te nevojat bazë. Rreth 90 për qind e familjeve i përdorin këto fonde për ushqim dhe shpenzime të përditshme, 36 për qind për shpenzime mjekësore dhe 30 për qind për arsim. Investimet prodhuese janë minimale, me më pak se 2 për qind të fondeve të përdorura për zgjerim biznesi ose inpute bujqësore.
Edhe pse një pjesë e madhe e dërgesave realizohet jashtë kanaleve zyrtare, Banka e Shqipërisë i përfshin këto flukse në treguesit zyrtarë të remitancave. Matja kryhet sipas standardeve të Fondi Monetar Ndërkombëtar dhe bazohet në një kombinim burimesh statistikore.
Burimi: Monitor, B. Hoxha
