Tjetër fitore cinike e Anglisë, me të njëjtin protagonist, Rahim Stërling. Ashtu si në ndeshjen e parë ndaj Kroacisë, “3 Luanëve” të drejtuar nga Sauthgejt, iu mjaftoi vetëm 1 gol për të triumfuar dhe për t’u graduar në vendin e parë të Grupit D.
Anglezët bënë kësisoj detyrat e shtëpisë në “Uembli”, duke siguruar kështu që sfidën e radhës të vlefshme për raundin e 1/8-ve, ta luajnë sërish në shtëpi.
Kundërshtari i “3 Luanëve” në fazën tjetër, do të jetë skuadra që do të renditet në vendin e dytë në Grupin F ku bëjnë pjesë Franca, Gjermania, Portugalia dhe Hungaria.
ÇEKI-ANGLI 0-1
Stërling 12′
Në ndeshjen tjetër, Kroacia arriti një triumf të madh duke mundur 3-1 Skocinë në shtëpinë e këtyre të fundit në ‘’Hampden Park’’ teksa ballkanasit kualifikohen për në raundin e 1/8-ve dhe duhet të presin të mbarojnë sfidat në dy grupet e mbetura për të mësuar kundërshtarin e radhës.
Të parët që kaluan në avantazh ishin kroatët me anë të Vlasiç në minutën e 17-të të takimit. Por avantazhi i kroatëve zgjati pak, pas 3 minuta nga fundi Amstrong barazoi rezultatin duke shpërthyer festa në stadiumin ‘’Hampden Park’’.
Pjesa e dytë nisi vrullshëm për Kroacinë e cila u hodh menjëherë në sulm për golin, duke e gjetur atë në minutën e 62-të me kapitenin Luka Modriç. Ylli i Realit realizoi një eurogol nga distanca duke shtangur portierin Marshall i cili e kishte të pamundur të neutralizonte gjuajtjen.
Për golin e tretë mendoi Perisiç i cili shfrytëzoi saktë një krosim të Modriç duke kërcyer mbi të gjithë. 3 gola për 3 pikë për Kroacinë e cila ngjitet në vendin e dytë në Grupin D, pasi ka golavarazhin më të mirë se Çekia e cila u mund 1-0 nga Anglia.
KROACI-SKOCI 3-1
17′ Vlasiç, Modriç 62′, Perisiç 77’/ MekGregor 42′
