570 të dënuar do të përfitojnë nga nisma ligjore për amnistinë nga Ministria e Drejtësisë. “U krye” shkruan ministri i Drejtësisë, Ulsi Manja në një postim në Facebook duke iu referuar premtimit që pati bërë në fushatë elektorale. Teksa policia, prokuroria dhe gjykata stërmundohen për të gjetur provat dhe mezi i arrestojnë, politika bën ligje për ti nxjerrë nga burgu. Sipas publikimit të Ministrisë, sqarohet se pushohet ndjekja penale për pjesën më të madhe të kundërvajtjeve që dënohen deri në 2 vjet.
Ndërkohë, përfitojnë nga 1 vit ulje dënimi të gjithë meshkujt dhe 1.5 femrat dhe të miturit që nuk perfitojne amnisti si te tjerët me përjashtim të të dënuarve me burgim të përjetshme të dënuarve per vrasje dhe subjekteve të SPAK.
Kriteret për përfitimin e amnistisë:
Përjashtohen nga vuajtja e dënimit:
personat meshkuj, dënuar me vendim gjyqësor të formës së prerë, me burgim deri në 3 vjet ose çdo lloj dënimi tjetër më të butë, duke përfshirë gjobën ose një nga llojet e alternativave të dënimit me burgim, për dënime të dhëna deri në datën 30.06.2023, pavarësisht nga koha e mbetur nga dënimi.
personat femra, dënuar me vendim gjyqësor të formës së prerë, me burgim deri në 4 vjet ose çdo lloj dënimi tjetër më të butë, duke përfshirë gjobën ose një nga llojet e alternativave të dënimit me burgim, për dënime të dhëna deri në datën 30.06.2023, pavarësisht nga koha e mbetur nga dënimi.
personat meshkuj, dënuar me burgim, të cilëve, deri në datën e hyrjes në fuqi të këtij ligji, u ka mbetur pa vuajtur nga ky dënim deri në 3 vjet.
personat femra, dënuar me burgim, të cilëve, deri në datën e hyrjes në fuqi të këtij ligji, u ka mbetur pa vuajtur nga ky dënim deri në 4 vjet.
personat e dënuar femra, të cilat, në datën e hyrjes në fuqi të këtij ligji, janë baras ose mbi moshën 50 vjeç.
personat e dënuar meshkuj, të cilët, në datën e hyrjes në fuqi të këtij ligji, janë baras ose mbi moshën 65 vjeç.
personat e dënuar me burgim, të cilët, në kohën e kryerjes së veprës penale, kanë qenë baras ose nën moshën 18 vjeç.
Të gjithë personat e dënuar, të cilët nuk plotësojnë kriteret për t’u përjashtuar nga vuajtja e dënimit, sipas pikës 1, të këtij neni, ose, edhe pse plotësojnë kriteret për përfitimin e amnistisë sipas këtij neni, nuk përjashtohen nga vuajtja e dënimit për shkak të kritereve ndaluese të përcaktuara në pikën 1 dhe 2, të nenin 4 të këtij ligji, u zbritet:
1 vit e gjysëm për personat e dënuar, gra, dhe të miturve;
1 vit për personat e dënuar, burra.
