Amfiteatri Antik i Durrësit u shndërrua në një qendër të gjallë të kulturës botërore, ku tingujt dhe ritmet e traditave folklorike pushtuan skenën antike në kuadër të Festivalit Ndërkombëtar të Muzikës dhe Valleve, organizuar nga World Festival Association.
Rreth 400 artistë nga vende të ndryshme të Europës dhe Ballkanit, përfshirë Ukrainën, Poloninë, Bullgarinë, Rumaninë, Malin e Zi, Bosnjë & Hercegovinën, Kroacinë, Turqinë dhe Serbinë, sollën para publikut këngë, valle dhe kostume tradicionale, duke e kthyer natën në një festë të ngjyrave dhe emocioneve.
Gradinat e amfiteatrit u mbushën nga qytetarë dhe turistë, të cilët falë hyrjes së lirë patën mundësinë të shijojnë nga afër një spektakël shumëkulturor ku arti ndërtoi ura mes popujve.
Në një hapësirë që mban mbi supe historinë e mijëra viteve, muzika dhe folklori krijuan një atmosferë të veçantë, ku e shkuara dhe e tashmja u takuan përmes kulturës.
Ky festival, tashmë pjesë e pandarë e jetës artistike të qytetit, pritet të vijojë edhe gjatë muajve të verës, duke e vendosur Durrësin në qendër të hartës kulturore ndërkombëtare.
