Një aksident automobilistik është regjistruar pasditen e sotme në Berat. Mësohet se aksidenti ka ndodhur shumë pranë spitalit të Beratit, në vendin e quajtur “Rrapi”, në lagjen “30-vjetori”. Mjeti tip Ford kamionçinë, i cili ishte i mbushur me bombola gazi është përplasur me një ambulancë, që po lëvizte me shpejtësi për shkak të një emergjence. Nga përplasja e mjeteve ka pasur vetëm dëme materiale, ndërsa mjekët që ndodheshin brenda në ambulancë dhe pacienti që po transportohej kanë marrë plagë të lehta. Po ashtu edhe dy drejtuesit e mjeteve, pra drejtuesi i kamionçinës dhe drejtuesi i ambulancës kanë marrë plagë të lehta dhe ndodhen jashtë rrezikut për jetën. Bëhet me dije se mjeti tip kamionçinë ishte i mbushur me bombola gazi në momentin që ka dalë nga një rrugë dytësore dhe i ka prerë rrugën ambulancës. Pas aksidentit, bombolat e gazit janë hequr me shpejtësi, për të shmangur rrezikun e ndonjë shpërthimi të mundshëm.
Mësohet se në vendin e ngjarjes kanë mbërrite forca të shumta policie, të cilat po punojnë për të zbardhur të plotë ngjarjen, po ashtu ata po punojnë për të zbuluar shkaqet dhe dinamikën e këtij aksidenti. Gjithashtu gjendja shëndetësore e të aksidentuarve është e qëndrueshme dhe jashtë rrezikut për jetën.
