Ministria e Shëndetësisë ka marrë masa për rastet e urgjencave mjekësore që mund të kenë qytetarët në këto ditë festash.
Gjatë një takimi me ekipin e urgjencës së Spitalit Universitar të Traumës, spital i cili pret dhe numrin më të madh të urgjencave gjatë ndërrimit të viteve, Ministrja e Shëndetësisë dhe Mbrojtjes Sociale tha se ekipet mjekësore do të garantojnë shërbim të shpejtë në çdo rast.
“Shërbim i përforcuar me ekipe mjekësore gjatë ditëve të festave dhe autoambulancë në sheshet kryesore të qyteteve, për të garantuar shërbim të shpejtë në rast të urgjencave mjekësore dhe më shumë siguri për qytetarët.”- deklaroi Ogerta Manastirliu.
Në sheshet ku do të festohet ndërrimi i viteve në të gjitha qytetet e Shqipërisë, është vendosur një autoambulancë nga ora 19:00 deri në përfundim të festës.
Në Tiranë do të ketë edhe dy autoambulanca të tjera në dizpozicion të festës të vendosura në sheshin Skënderbej.
Mësohet se janë marrë masa edhe për shtimin e personelit me mjekë dhe infermierë në Njësinë e Koordinimit të Urgjencës Mjekësore dhe kjo për shkak të rritjes së numrit të thirrjeve të urgjencës gjatë ditëve të fundit, si edhe një ekip shtesë me mjekë dhe infermierë “on call”.
Masat e përforcuara do të zbatohen nga të gjitha ekipet mjekësore në datat 31, 1 dhe 2 janar 2019, për t’iu përgjigjur të gjitha thirrjeve në rast nevoje nga qytetarët.
