Kandidatura e Kathleen Ann Kavalec për të qenë ambasadore e Shteteve të Bashkuara të Amerikës në Shqipëri i është kthyer mbrapsht presidentit Donald Trump.
Nominimi i saj për të qenë ambasadore e SHBA në Tiranë mbërriti në Senat në 9 korrik 2018, por kanididatura i është kthyer presidentit Trump gjatë ditës së djeshme, pasi ka kaluar afati për rishqyrtim sipas dispozitave të Rregullores së Senatit Amerikan.
Kandidatura e saj mbeti në shqyrtim nga Komisioni i Marrëdhënieve me Jashtë dhe nuk kaloi në votim, megjithatë pritet që Trump të dërgojë sërish në Senat kandidaturën e Kathleen Ann Kavalec.
Çfarë thotë rregullorja e Senatit Amerikan, paragrafi 6:
Nominimet që as nuk janë konfirmuar dhe as refuzuar gjatë seancës në të cilën po bëhen, nuk do të veprojnë në asnjë seancë pasuese, pa u bërë përsëri nga ana e Presidentit në Senat. Dhe nëse Senati do të shtyjë apo do të marrë një pushim për më shumë se 30 ditë, të gjitha propozimet që janë në pritje do të kthehen nga Sekretari i Presidentit, dhe nuk do të shqyrtohen përsëri vetëm nëse bëhen përsëri në Senat nga Presidenti.
Kush është Kathleen Ann Kavalec:
Kavalec aktualisht shërben si Zëvendës Ndihmës Sekretar në Byronë e Çështjeve Evropiane dhe Euroaziatike në Departamentin e Shtetit me mbi tre dekada përvojë si një diplomate amerikan.
Më parë ka shërbyer si Drejtoreshë e Zyrës për Çështje Ruse, Zëvendës Shefe e Misionit të SHBA-ve në UNESCO në Paris, Francë, Zëvendës Koordinator epër Ndihmë në Byronë Evropiane dhe Drejtore për Parandalimin e Konflikteve në Zyrën e Koordinatorit për Rindërtim dhe Stabilizim.
Ajo flet rrjedhshëm gjuhën frënge, rumune, ukrainase, ruse, spanjolle dhe portugeze.
