Raport progresi i Komisionit Evropian ka pasaktësi në vlerësimet për Shqipërinë ose fsheh mes rreshtave të vërtetat që i ulin pikë në pjesë jo kryesore. Kuptohet, që ndikimi i qeverisë shqiptare në hartimin e ketij raporti është i dukshëm. Nuk është surprizë, po të kemi parasysh sjelljen e shefit të misionit të BE-së në Tiranë, Luixhi Soreca, që ka varësi të dukshme nga qëndrimet e kryeministrit Rama. A duhet ta besojmë raportin?
Hyrja, ku jepen konkluzionet e raportit të KE për Shqipërinë nënvizon se nuk ka “asnjë progres” në lidhje me lirinë e shprehjes dhe shoqërisë civile gjatë periudhës së raportimit. Duke shfletuar, në faqen 33, i njëjti raport nënvizon se policia e antiterrorit arrestoi një aktiviste të shoqërisë civile 25 vjeçe dhe e mbajti atë në paraburgim për 4 ditë për shpërndarjen e një artikulli në faqen e saj në Facebook; Më tej raporti thotë se policia ka rrahur gazetarë dhe aktivistë të tjerë të shoqërisë civile që marrin pjesë në protesta kundër shkatërrimit të Teatrit Kombëtar. Pra pse nuk ka humbur pikë Shqipëria në vlerësimin për lirinë e shprehjes? Pse paketa antishpifje, e kundërshtuat dhe nga Komisioni i Venecias, nuk e cenon lirinë e shprehjes?
Ka edhe kontradikta logjike në raport lidhur me marrëveshjen e 5 qershorit të qeverisë dhe opozitës mbi reformën zgjedhore dhe ndryshimet në kodin zgjedhor të miratuar në 23 korrik. KE argumenton se kushti për “reformën elektorale konsensuale”, të vendosur nga Këshilli për të hapur bisedimet e pranimit me Shqipërinë, është përmbushur, pavarësisht nga fakti që në 5 Tetor 2020 partia në pushtet miratoi ndryshime të tjera në kodin zgjedhor pa një konsensus me opozitën. Nuk kuptohet pse ndryshimi i njëanëshëm i rregullave të lojës të vendosura nga PS nuk shkelën ato që u vendosën në Këshillin Politik të reformës zgjedhore
Ndërkaq, KE raporton se Komisioni i Venecias lëshoi një mendim mbi një mosmarrëveshje në lidhje me procedurën e emërimit të njërit prej gjykatësve të emëruar në fund të vitit 2019. Këtu, raporti i KE nuk shkruan se për të njëjtin problem, Delegacioni i BE në Tiranë doli në anën e Qeverisë dhe mbështeti përpjekjen për procedurë të paligjshme. Raporti kësisoj duket sikur është shkruar jo për publikun dhe vendimmarrësit në Bruksel, por për të mos mërzitur autokratin Rama.
Kështu, njeriut i lind e drejta të mendojë se këto raporte janë më pranë opinioneve të qeverisë së të vërtetave dhe fakteve.
/Gazeta Reforma/
