Teksa ndodhemi 1 muaj para zgjedhjeve lokale, ndeshemi përballë investimit në infrastrukturë, si një mekanizëm elektoral.
Gazetari Artan Hoxha ka publikuar disa foto të asfaltit elektoral, në fushatën e zgjedhjeve vendore të 14 majit. Në një status në rrjetet sociale, ai thotë se vetëm në zgjedhje mund të hidhet ndonjë lopatë asfalt.
Me ironi ai kërkon të bëhen zgjedhje dy herë në vit që të asfaltohen rrugët, pasi shprehet se kur ato mbarojnë punon vetëm ujësjellësi.
“Rrofshin zgjedhjet që të hedhin ndonjë lopate asfalt… pa u pa puna… Aman ore bëni zgjedhje dy herë në vit, të paktën asfaltohen rrugët!!! Se pas zgjedhjeve vetëm ujësjellësi punon, për të hapur kanale mbi rrugët e shtruara…”, shkruan gazetari Artan Hoxha.
Vlen të theksojmë se drita, uji dhe rrugët kanë qenë premtimet e politikanëve shqiptarë gjatë këtyre 30 viteve demokraci.
Të gjithë, nga qendra deri te vendorët, kanë premtuar bërjen e rrugëve, drita dhe ujë 24 orë. Por, duke lënë mënjanë dritat dhe ujin, në zgjedhjet vendore të 14 maji 2023, kryefjalë janë rrugët, pra e thënë ndryshe asfalti elektoral. Zgjedhjet vendore kanë sjellë një bum investimesh në të gjitha bashkitë si një mënyrë për të ‘joshur’ qytetarët para se ata t’iu drejtohen kutive të votimit me datë 14 maj.
