Në orët e para të mëngjesit të sotëm, Kryeministri i Kosovës, Albin Kurti, zhvilloi një mbledhje të jashtëzakonshme të Këshillit të Sigurisë së Republikës së Kosovës.
Mbledhja u thirr pas sulmit të tretë brenda 72 orëve, i cili këtë herë kishte në shënjestër infrastrukturën kritike të vendit, përfshirë sistemin e furnizimit me ujë dhe prodhimin e energjisë elektrike.
Indikacionet e para tregojnë se sulmi është organizuar nga shteti serb, që ka kapacitetet për të realizuar veprime të tilla kriminale dhe terroriste.
Organizatat terroriste si “Mbrojtja Civile” dhe “Brigada Veriore,” të udhëhequra nga Millan Radoiçiç dhe të mbështetura nga Qeveria dhe Presidenti i Serbisë, janë të dyshuara për përgatitjen dhe ekzekutimin e këtyre sulmeve.
Gjatë diskutimeve, u theksua edhe mundësia e ndërlidhjes së këtyre ngjarjeve me sulmet e fundit të Rusisë ndaj infrastrukturës energjetike të Ukrainës, të cilat kanë lënë mbi një milion familje pa energji elektrike në prag të dimrit.
Këshilli i Sigurisë ka aprovuar masa shtesë për të forcuar sigurinë rreth objekteve dhe shërbimeve kritike si ura, trafostacione, antena, liqene, kanale etj. Policia e Kosovës dhe Forca e Sigurisë së Kosovës do të aktivizohen në terren për këtë qëllim. Po ashtu është intensifikuar bashkëpunimin ndërinstitucional dhe ai ndërkombëtar për të parandaluar sulme të ngjashme në të ardhmen.
“Shteti ynë është i vendosur dhe i përgatitur për t’i mbrojtur qytetarët e tij dhe infrastrukturën kritike. Ne nuk do të tolerojmë akte të tilla që synojnë destabilizimin e Kosovës dhe kërcënojnë paqen dhe funksionimin demokratik. Situata po vihet nën kontroll drejt rikthimit në normalitet. Kërkojmë nga të gjithë faktorët ndërkombëtarë që ta dënojnë këtë sulm që na shkaktoi dëmtime të mëdha.”, tha Kurti.
Ndërkohë Policia Kosovës po ushtron kontrolle në disa shtëpi të fshatit Varage të Zubin Potokut.
