Pasditen e sotme një ngjarje me eksploziv ka ndodhur në qytetin e Shkodrës. Pas një alarmi për bombë forca të shumta policie kanë rrethuar zonën. Menjëherë në vendngjarje kanë mbërritur forcat xheniere nga Tirana, të cilët kanë bërë shpërthimin e komanduar të lëndës shpërthyese. Eksplozivi i është vendosur një mjeti tip ‘Range Rover’, i cili i përket drejtoreshës së Operatorit të Kujdesit Shëndetësor, Suida Kuka. Nga shpërthimi fatmirësisht nuk ka të lënduar.
Mësohet se ka qenë një person ende i paidentifikuar, i cili ka njoftuar policinë për eksplozivin në mjetin e drejtoreshës. Menjëherë, forca të shumta policore kanë rrethuar zonën, ndërsa kanë njoftuar forcat xheniere të Tiranës. Këto të fundit kanë mbërritur në vendngjarje, duke bërë shpërthimin e kontrolluar të eksplozivit, i cili ka qenë i vendosur pranë mjetit të Kukës. E kontaktuar nga “Balkanëeb”, drejtoresha Kuka ka thënë se është njoftuar për ngjarjen nga policia, e cila i kërkuar që të largohet bashkë me stafin nga institucioni.
Nuk dihet ende nëse ngjarja ka lidhje me drejtoreshën, e cila është prej pak muajsh në këtë post. Ndërkohë që në zonën përreth ka kamera të shumta sigurie, për shkak edhe të institucionit, dhe policia po i këqyr për të nxjerrë të dhëna që do të cojnë në zbulimin e personit, i cili vendosi eksplozivin te mjeti i parkuar.
