Pas alarmit për bombë të dhënë paraditen e djeshme në Kuvendin e Kosovës, Policia ka nisur hetimet në bashkëpunim me prokurorinë dhe institucionet e tjera të sigurisë për të zbuluar burimin e mesazhit kërcënues.
Sipas informacioneve paraprake, dyshohet se kërcënimi është bërë përmes një telefonate që ka ardhur nga një numër me origjinë të dyshuar nga Serbia.
Në një njoftim zyrtar, Policia e Kosovës bën me dije se hetimet po vijojnë në koordinim me partnerët ndërkombëtarë të sigurisë, me fokus në gjurmimin e burimit të thirrjes, identifikimin e mjeteve të komunikimit të përdorura dhe zbardhjen e rrjeteve të mundshme që qëndrojnë pas saj.
Alarmi detyroi evakuimin e menjëhershëm të deputetëve dhe ndërprerjen e punimeve në sallën plenare, ku ishte parashikuar vazhdimi i seancës konstituive.
Pas kontrolleve të kryera, u konfirmua se bëhej fjalë për një alarm të rremë, por megjithatë, seanca nuk arriti të zhvillohej plotësisht dhe u ndërpre sërish pa një përfundim.
