Eurodeputetja italiane Rachele Scarpa dhe eurodeputetja Cecilia Strada i kanë drejtuar një kërkesë urgjente Këshillit të Evropës, duke ngritur alarmin për gjendjen alarmante në Qendrën e Paraburgimit të Riatdhesimit në Gjadër, Shqipëri. Sipas tyre, po shkelën haptazi të drejtat themelore të njeriut.
Dy deputetet theksojnë se, gjatë 13 ditëve të monitorimit të kampit, janë regjistruar 35 ngjarje kritike, ose mesatarisht 2.7 incidente në ditë, përfshirë rreth dhjetë tentativa vetëvrasjeje. Ky bilanc tronditës përforcon shqetësimet mbi sigurinë dhe mirëqenien e të ndaluarve, që sipas raportit, ndodhen në kushte tejet të rënda.
Në një raport të detajuar, i hartuar pas disa vizitave inspektuese dhe në bashkëpunim me përfaqësues të opozitës dhe të Tryezës së Azilit dhe Imigracionit, eurodeputetet nënvizojnë një sërë shkeljesh. Sipas tyre, ekzistojnë mospërputhje serioze mes praktikave të ndjekura dhe Konventës Evropiane për të Drejtat e Njeriut. Për këtë arsye, ato i kanë kërkuar Komitetit Evropian për Parandalimin e Torturës të shqyrtojë një vizitë urgjente të ekspertëve të tij në Gjadër.
Raporti ndalet veçanërisht te transformimi i qendrave të ndalimit për azilkërkuesit në qendra riatdhesimi, pas një dekreti të qeverisë së Giorgia Melonit më 28 mars të vitit të kaluar. Ky vendim, sipas autorëve të raportit, është ndërmarrë në përpjekje për të shpëtuar projektin italian të bashkëpunimit me Shqipërinë për menaxhimin e migrantëve.
“E pamë qendrën me sytë tanë, folëm me pothuajse të gjithë personat e ndaluar në dy javët e para dhe konsultuam në thellësi regjistrin e ngjarjeve kritike, duke zbuluar një pamje shumë serioze”, deklarojnë Scarpa dhe Strada.
Nga dhjetë vizitat e realizuara midis 9 dhe 27 prillit, rezultoi se mangësia e transparencës, vështirësitë në sigurimin e informacionit, si dhe metodat e transferimit ishin thellësisht problematike dhe në kundërshtim me respektin për dinjitetin njerëzor. Deputetet sqarojnë se askush nga të ndaluarit nuk ishte i vetëdijshëm se do të dërgohej në Shqipëri, ndërsa kriteret e përzgjedhjes mbeten ende të paqarta.
Gjendja më shqetësuese mbetet ajo psiko-fizike e të ndaluarve, të cilët mbahen në kontejnerë dhe kanë kryer akte të rënda vetëlëndimi, deri në tentativa vetëvrasjeje, të regjistruara zyrtarisht në vetëm dy javë.
Përballë kësaj situate, eurodeputetet presin një reagim të shpejtë nga autoritetet evropiane, ndërsa shqetësimi për trajtimin e migrantëve në Gjadër vjen në një moment kur projekti i zhvendosjes së tyre nga Italia në Shqipëri po vëzhgohet me lupë nga komuniteti ndërkombëtar.
