Çështja e pronave në jug në bregdetin e jugut ka marrë një vëmendje ndërkombëtare dhe për këtë është siguruar vet gazetari me origjinë greke, John Psaropoulos.
Psaropoulos ka realizuar një reportazh të plotë rreth kësaj çështje dhe transmetuesi ka qenë një nga gjigandët mediatik në botë “Al Jazeera”.
Gazetari ka përgatitur një material ku fokusi qendror është tek grabitja e pronave të minoritetit grek nga qeveria për realizimin e disa projekteve.
Mirëpo kush ka qenë zëri shqiptar që ka folur rreth kësaj çështjeje? Vetë kreu i Partisë Demokratike, Lulzim Basha, i cili në hapësirën e tij ka thënë se qeveria shqiptare punon për të rrëmbyer tokat e qytetarëve për t’ia shpërndarë këto më pas një dore oligarkësh të zgjedhur.
“Ajo qe kemi është një qeveri që komploton natë e ditë që pronën private dhe publike t’ua japë oligarkëve që janë në fakt predatorë të qeverisë që i marrin këto prona dhe i zhvillojnë në mënyra të dyshimta” tha ai.
Mirëpo nuk ka pasur vetëm zëra kundër qeverisë, pasi gazetari ka intervistuar edhe Kreun e Grupit Parlamentar të Partisë Socialiste, njëkohësisht Sekretarin e Përgjithshëm të saj, Taulant Ballën.
Balla ka thënë se qeveria është duke ndërmarrë një reformë të rëndësishme e cila ka për t’ju garantuar investitorëve investim në përputhje me ligjin.
“Sfida jonë kryesore mbetet zhvillimi i turizmit, ne jemi duke ndërmarrë një reforme të madhe për titujt e pronësisë në Shqipëri, që do të garantojë investitorët e huaj që toka ku ata do të hedhin fondet e tyre është plotësisht në përputhje me ligjin” tha ai.
