Kryeministri Edi Rama i është përgjigjur akuzave të kryedemokratit Lulzim Basha, për maskat e skaduara.
Në një postim në Twitter, kreu i qeverisë shkruan, se maskat e dëmshme në Shqipëri, janë ato që kërkojnë pushtet e rrëmujë, edhe kur vendi kërcënohet nga viruset.
Postimi i Ramës në Twitter:
Ka vetëm një palë maska të dëmshme në Shqipëri: Maskat e atyre që dhe kur ky vend lufton me jetën nën gërmadhat e tërmetit apo me një virus kërcënues për planetin, s’ndalen së kërkuari pushtet me shpifje, sherr, rrëmujë! Po përsëri Shqipëria do t’ia dalë sepse shqiptarët s’janë vetëm!
Pak momente më parë, Basha në një deklaratë për mediat akuzoi qeverinë se ka shpërndarë 1 milion e 200 maska të skaduara.
Ai ftoi Prokurorinë të nisë hetimet, duke e cilësuar këtë që ka ndodhur një krim ndaj stafeve shëndetësore.
Ndër të tjera ai shtoi, se ekipet e nxjerra në terren nga PD, kanë konstatuar se mjekët nuk janë pajisur me masa mbrojtëse.
Shqipëria që prej ditës së djeshme është futur në hartën e vendeve të prekura nga koronavirusi, ku tashmë numërohen 10 të prekur.
