Festim Xhafaj, me detyrë efektiv në Komisariatin e Policsë së Himarës është vënë këtë të enjte në prangat e kolegëve pasi akuzohet për përndjekje dhe dhunë në familje. Sipas Policisë, Gjykata e Vlorës ka caktuar masën e sigurisë ‘Arrest me burg”, për efektivin, për akuzat: “Përndjekje”, “Dhuna në familje”, “Mosbindje ndaj urdhrit të punonjësit të policisë së rendit publik”, si dhe “Prodhimit, mbajtjes, blerjes apo shitjes pa leje të armëve të ftohta”.
Nga këqyrja e automjetit u gjetën dhe u sekuestruan në cilësinë e provës materiale 2 armë të ftohta (thikë e biçak). Siç shihet dhe në pamjet e publikuara nga AMP, efektivët hapin derën me forcë dhe mësyjnë në banesë duke arrestuar kolegun.
NJOFTIMI I AMP:
Agjencia e Mbikëqyrjes Policore (Rajoni Vlorë-Gjirokastër), në bashkëpunim me DVP Vlorë kanë ndaluar punonjësin e policisë të Komisariatit Himarë F.XH., i dyshuar për kryerjen veprave penale “Përndjekje”, “Dhuna në familje”, “Mosbindje ndaj urdhrit të punonjësit të policisë së rendit publik”, si dhe “Prodhimit, mbajtjes, blerjes apo shitjes pa leje të armëve të ftohta”. Kapja e këtij shtetasi u bë e mundur pas informacioneve të siguruara në rrugë operative nga Agjencia e Mbikëqyrjes Policore mbi vendndodhjen e tij, pasi Gjykata e Shkallës së Parë të Juridiksionit të Përgjithshëm Vlorë kishte caktuar në mungesë masën e sigurisë personale “Arrest në burg”.
