Kallëzimi i deputetëve socialistë të Komisionit të Shëndetësisë për ish-kryeministrin Sali Berisha, ka kaluar në dorë të Prokurorisë së Tiranës.
Ka qenë Prokuroria e Përgjithshme e cila shpalli moskompetencën për këtë dosje, duke ia kaluar organit të akuzës të Tiranës.
Padia ndaj ish-kryeministrit u dorëzua më 12 mars në Prokurorinë e Përgjithshme.
Berisha akuzohet nga socialistët për shpërndarje lajmesh dhe imazhesh të rreme për koronavirusin, duke ngjallur pasiguri tek qytetarët.
Lajmin për depozitimin e padisë më 12 mars, e bëri publik kreu i Grupit të PS, Taulant Balla, nëpërmjet një postimi në Facebook.
Postimi i Ballës
Këto ditë të emergjencës kur duhet të gjithë të zbatojnë udhëzimet, vendimet dhe urdhërat e qeverisë dhe ekspertëve, më i rrezikshëm se koronavirusi është përhapja e panikut. Dhe më e ndyrë se përhapja e panikut, është përhapja e qëllimshme e panikut.
Në Shqipëri këtë fushatë të turpshme po e udhëheq Sali Berisha, e pas tij “turisti” i emëruar në krye të SHQUP. Facebook-u i Sali Berishës është një makinë paniku që punon 24 orë me ligësi dhe këmbëngulje për të terrorizuar qytetarët.
Sapo është depozituar në Prokurorinë e Përgjithshme, kallzimi penal i deputetëve të Komisionit të Shëndetësisë në Kuvendin e Shqipërisë, për veprën penale “Përhapja e informatave të rreme që ngjallin panik”, parashikuar nga Neni 267 i Kodit Penal, kundër shtetasit Sali Berisha, i biri i Ram dhe Sheqere, i datëlindjes 15.10.1944 lindur në Tropojë e banues në Tiranë.
Ne dhe publiku shqiptar kemi besimin se institucioni i Prokurorisë, në bashkëpunim me gjykatën dhe kushtëzimet proceduriale, do të veprojë në mënyrë të shpejtë, efikase dhe pa ngurim, dhe presim me vëmendjen maksimale dhënien rrugë të këtij kallëzimi sipas procedurës përkatëse.
Çdo veprim i Drejtësisë në respekt të ligjit, nuk është thjeshtë një përgjigje ndaj veprimeve të qëllimshme panikuese të të akuzuarit, por është edhe shprehje e ushtrimit të detyrës institucionale dhe qytetare në mbrojtje të jetës dhe sigurisë publike, si dhe të vlerave e parimeve të lirisë së fjalës, demokracisë funksionale dhe shtetit të së drejtës .
Deputetët që kanë paraqitur kallzimin, shprehin gatishmërinë për tu vënë dizpozicion të veprimeve hetimore në çdo moment, të bindur se Prokuroria do të angazhohet seriozisht për hetimin e të akuzuarit dhe për ta vënë atë para drejtësisë sipas kompetencave dhe procedurës së parashikuar nga ligji.
Bilanci i COVID-19 në vendin tonë është 51 të prekur dhe 1 viktimë.
Në godinën e Infektivit janë shtruar 20 pacientë, ndërsa pritet që edhe Sanatoriumi të kthehet në karantinë.
