Gjatë ditëve të fundit, presidenti Ilir Meta ka sulmuar ashpër përfaqësitë e huaja në vendin tonë.
Kreu i shtetit nuk ka nguruar t’i quajë palaço, vagabondë apo palë të krimit të organizuar.
Këto deklarata janë komentuar nga ambasadorja franceze në Shqipëri, Kristina Vasak në një intervistë për “Abcnews”.
Kjo e fundit i ka dalë në mbrojtje ambasadorit të OSBE, Bernd Borchardt, të cilin Meta e shpalli “non grata”
Vasak është shprehur se diplomatët nuk ndodhen në Shqipëri, për të zëvendësuar autoritetet vendase, por roli i tyre nuk duhet të neglizhohet.
Ajo shprehet, se nuk njeh asnjë vagabond në komunitetin diplomatik në Tiranë.
Diplomatja franceze vijon më tej, duke thënë se këto deklarata nuk janë serioze.
“Ka një ngarkesë kundër diplomatëve. Por diplomatët kanë një rol që nuk mund të neglizhohet. Nuk jam as unë as ndonjë tjetër që mund të thotë të kundërtën. Por ama ky rol as nuk duhet ekzagjeruar. Diplomatët nuk janë këtu për të zëvendësuar autoritetet kompetente. Unë mendoj që ka pasur një ngutje kur janë përdorur ato fjalë. Nuk e dija kuptimin në shqip të fjalës vagabond, në kuptimin e gansterit, por unë nuk njoh personalisht në komunitetin diplomatik këtu në Tiranë asnjë grua apo burrë diplomat sadopak vagabond. Sinqerisht. Dhe nuk e them këtë për solidaritet, se ndoshta po e mendoni. Jo, nuk është një refleks solidariteti. Sa i takon krahasimit me banda apo grupe kriminale, çfarë është kjo? Të jemi seriozë! Unë kam tendencë t’i marr gjërat më ironi ndonjerë, por këtu le të bëhemi seriozë! Po, diplomatët takohen. Po, diplomatët mblidhen rregullisht. Dhe grupi i parë, për ne francezët, si edhe për të tjerët, është ai i ambasadorëve të Bashkimit Europian”, tha Vasak.
Më tej ajo tregon se Borchardt-in e njeh qëkur punonte në Gjermani.
Sipas saj çdokush mund të shkasë, por nuk është në interes të askujt, që t’i përvishet një diplomati.
“Njihemi që nga Gjermania, sepse kam punuar jo pak në Gjermani. Dhe mendoj se nuk është në interes të askujt që t’i përvishet një diplomati, cilido qoftë ai. Nuk është në interesin e askujt. Çdokush mund të shkasë. A kishte shkarje, këtë nuk më takon mua ta them. Por mendoj se askush nuk ka interes kundër Bernd Borschardt, sepse, të mos harrojmë, Shqipëria po bëhet gati të marrë presidencën e radhës të OSBE-së në 2020. Askush nuk ka interes të tregojë me gisht përfaqësuesin e OSBE-së këtu. Askush! “, shprehet ajo.
Në lidhje me përmendjen e armëve nga Meta, Vasak thotë se është e trishtuar, që ky argument vjen pas nismës franko-gjermane, që synon eleminimin në të gjitha vendet e rajonit të armëve të lehta dhe municionit.
Vasak nuk ka një përgjigje, nëse veto e Francës për negociatat erdhi për shkak të krizës politike, por pranon se Parisi dhe Berlini po negociojnë në të gjitha nivelet, për rrugën që duhet ndjekur.
