Nike lajmëroi se i dha fund partneritetit të saj me Neymar pasi ylli brazilian i futbollit nuk do të bashkëpunonte në një hetim të akuzave për sulme seksuale kundër tij të bëra nga një punonjëse e kompanisë.
“Nike i dha fund marrëdhënies së saj me atletin sepse ai refuzoi të bashkëpunonte në një hetim të mirëbesimit të pretendimeve të besueshme për keqbërje nga një punonjëse,” tha kompania në një deklaratë. “Që nga fillimi, ne kemi trajtuar pretendimet e punonjëses dhe përvojën e saj me shumë seriozitet.”
Gjiganti i veshjeve sportive me bazë në Oregon ndërpreu lidhjet me Neymar në gusht të vitit 2020 dhe në atë kohë nuk dha asnjë shpjegim publik për ndarjen. Ëall Street Journal, i cili raportoi për herë të parë hetimin e sulmit seksual, tha se kishin mbetur tetë vjet në kontratën e marketingut të Nike me atletin.
Nike tha në deklaratën e saj se ishte “shqetësuar thellë” nga akuzat për sulme seksuale të bëra nga punonjësja në vitin 2018, dy vjet pasi ndodhi ngjarja e pretenduar. Ajo doli përpara në një forum të ndërmarrjes ku anëtarët e tanishëm dhe të ish-stafit ishin në gjendje të ndajnë me konfidencialitet shqetësimet.
Bizneset në të gjithë SHBA po rimendojnë politikat e tyre pasi lëvizja #MeToo vuri në qendër të vëmendjes ngacmimet seksuale gjatë viteve të fundit. Nike në veçanti është nën presion për të provuar angazhimin e saj për të mbrojtur gratë në vendin e punës pasi dy drejtues të lartë u larguan papritur nga kompania në vitin 2018. Ata dyshohet se kishin mbrojtur punonjës meshkuj që keqtrajtonin kolegët femra.
Një zëdhënës i Neymar tha se ai e mohon pretendimin dhe ndarja kishte ndodhur për arsye komerciale. “Neymar Jr do të mbrojë fuqishëm veten e tij kundër këtyre sulmeve të pabazuara në rast se paraqitet ndonjë pretendim, gjë që nuk ndodhi deri më tani,” thuhej në një deklaratë.
Nike e quajti hetimin e saj mbi pretendimet “pa përfundim”.
“Asnjë grup i vetëm i fakteve nuk u shfaq që do të na mundësonte të flisnim thelbësisht mbi këtë çështje,” thnë ata në deklaratë. “Do të ishte e papërshtatshme për Nike të bënte një deklaratë akuzuese pa qenë në gjendje të siguronte fakte mbështetëse.” Deklarata nuk dha hollësi për natyrën e pretendimeve të gruas.
Gazeta tha se punonjësja u tha miqve dhe kolegëve në 2016 se Neymar ishte përpjekur ta detyronte atë të kryente seks oral në dhomën e tij të hotelit në Neë York City, duke cituar njerëz të njohur me këtë çështje dhe dokumentet e shqyrtuara nga gazeta. Punonjësja po ndihmonte në koordinimin e logjistikës dhe eventeve për Neymar dhe grupin e tij, raportoi ajo.
