Partia Demokratike ka inskenuar një situatë të re bllokimi për banorët e Unazës së Re.
Të paktën kështu bën me dije ‘Shqiptarja.com’.
Ata kanë strehuar disa familje në një ndërtesë pa leje, por të shpronësuar tashmë.
Përfaqësues të PD nxituan të zhvendosin disa familje në godinën që ishte lajmëruar muaj më parë se do të prishej për t’i hapur rrugë projektit të Unazës së Madhe.
Ata u vizituan asokohe edhe nga vetë kreu demokrat Lulzim Basha, që do i servirte ato si familje të prekura drejtpërdrejte nga tërmeti.
Mirëpo, sipas ‘Shqiptarja.com’ realiteti është krejt tjetër.
Sipas saj, shumë prej këtyre familjeve nuk kanë pasur fare në zotërim shtëpi në Tiranë, por kanë jetuar me qira në zona të ndryshme të kryeqytetit ose nga qytetet prej nga vijnë.
Pra, edhe nëse u është dëmtuar banesa ku jetonin me qira, ato do të mund të lëviznin në një tjetër shtëpi me qira. Madje, ka prej atyre të cilët janë zhvendosur nga Ostreni i Dibrës, si familja e M.Nuredinit apo familja e E.Shehut që është nga Zall Dardha po e Dibrës, pra shumë larg zonave ku tërmeti shkaktoi probleme.
Një tjetër familje që tregon manipulimin e PD me këto familje për të penguar ndërtimin e Unazës së Madhe, është dhe ajo e B. Babajt.
Nga Fajze e Kukësit ajo është zhvendosur nga PD pikërisht në këtë qendër tregtare.
Pikërisht këtë fakt ka shfrytëzuar edhe PD duke i strehuar në një qendër tregtare dhe duke i “shpëtuar” nga pagesa e qirasë, e në të njëjtën kohë për ta shitur në opinionin publik sikur jetojnë familje të prekura nga tërmeti.
Por, në fakt ndërtesa ku këto familje janë strehuar nuk është aspak shtëpi, por një qendër e mirëfilltë tregtare, ku zotëruesi i saj po tenton që ta shpëtojë biznesin e ndërtuar në tokë të uzurpuar, edhe pse tashme është shpronësuar dhe dëmshpërblyer.
*Ky lajm është një akuzë e gazetës online ‘Shqiptarja.com’, pasi asgjë nuk është verifikuar ende.
