Autoriteti Kombëtar i Ushqimit ka reaguar në lidhje me rastin e dyshuar të helmimit të disa fëmijëve në Kopshtin Nr.1 të Gramshit, duke publikuar rezultatet e para të analizave mbi ushqimet e konsumuar.
Sipas njoftimit zyrtar të bërë publik këtë të mërkurë, kampionët e marrë nga institucionet në Gramsh dhe furnizues në Tiranë nuk kanë rezultuar të kontaminuar me bakterin Salmonella spp, të paktën sipas analizave laboratorike të deritanishme.
Më konkretisht, nuk është konstatuar prania e salmonelës në këto produkte:
• Qumësht dhe kofshë pule, kampionuar nga DRAKU Elbasan;
• Qumësht, kofshë pule dhe vezë, kampionuar nga DRAKU Tiranë.
Ndërkohë, disa mostra të tjera janë ende në proces analizimi. Bëhet fjalë për:
• Vezë të marra nga DRAKU Elbasan;
• Kofshë pule të marra nga DRAKU Tiranë.
Mostrat janë dërguar për verifikim në Laboratorin e Referencës pranë Institutit të Sigurisë Ushqimore dhe Veterinarisë, ku do të bëhet vlerësimi për ndonjë prani të mundshme të salmonelës apo ndonjë kontaminimi tjetër.
Njoftimi i plotë i AKU
“Në kuadër të transparencës, Autoriteti Kombëtar i Ushqimit vijon ndjekjen e procedurave ligjore dhe informimit të publikut, lidhur me kampionaturat e marra në produktet ushqimore lëndë e parë në kopshtin Nr .1 në qytetin e Gramshit dhe në subjektin furnizues në Tiranë, të cilat u dërguan për analizim për treguesin Salmonella spp pranë Laboratorit të Referencës në ISUV.
Informojmë se për mostrat e dërguara për analizim për produktet lëndë e parë qumësht dhe kofshë pule, të kampionuara nga DRAKU Elbasan, si dhe produktet qumësht, kofshë pule, vezë e kampionuar nga DRAKU Tiranë, kanë rezultuar të pastër për treguesin Salmonella spp.
Ndërsa për produktin vezë kampionuar nga DRAKU Elbasan dhe kofshë pule kampionuar nga DRAKU Tiranë, analizimi është ende në proces.
Sapo të kemi këtë informacion, AKU do të vijojë me informimin e mëtejshëm të publikut”, thueht në reagimin e AKU.
