Prokuroria pranë Gjykatës së Shkallës së Parë të Vlorës, ka reaguar në lidhje me sulmin në makinën e prokurorit, Albert Kuliçi.
Organi i akuzës e ka cilësuar si ngjarje të rëndë dhe sulm ndaj prokurorit për shkak të detyrës.
Sipas prokurorisë, ku është një akt kriminal, i papranueshëm për vlerat dhe parimet shoqërore.
Më tej në reagim thuhet se Prokuroria e Vlorës do të jetë gjithmonë e pandikuar në luftën pa kompromis kundër krimit.
Reagimi i Prokurorisë së Vlorës
“Prokuroria pranë Gjykatës së Shkallës së Parë Vlorë, pas ngjarjes së rëndë dhe kriminale, të ndodhur rreth orës 03.00 të mëngjesit të datës 21.12.2019, si pasojë e shpërthimit të një sasie lënde eksplozive, vendosur në mjetin me targa AA583OO, në pronësi të prokurorit, z. Albert Kuliçi, me detyrë zv/ Drejtues i kësaj prokurorie, si dhe pas analizimit të detajeve të ngjarjes, e konsideron këtë ngjarje si një sulm të drejtuar ndaj këtij prokurori për shkak të funksionit dhe detyrës së tij.
Ky është një akt kriminal, i papranueshëm me sistemin tonë të drejtësisë, parimet e Shtetit të së Drejtës, vlerat dhe parimet shoqërore, që synon të cënojë detyrën e tij si prokuror dhe gjithashtu të intimidojë në luftën kundër krimit.
Prokuroria e Rrethit Gjyqësor Vlorë, dënon rëndë akte të tilla kriminale, të cilat në thelb dëmtojnë rendin dhe sigurinë juridike. Duke mbështetur kolegun tonë në vijim, trupa e Prokurorëve të kësaj prokurorie, në respektim të ligjit dhe parimeve Kushtetuese, do të jetë gjithmonë e pa ndikuar në luftën pa kompromis kundër krimit”
Kujtojmë këtu se në orët e para të së shtunës, shpërtheu makina e prokurorit të Vlorës, Albert Kuliçi.
Kamerat fiksuan edhe autorin, i cili për 30 sekonda vendos tritolin dhe largohet.
Automjeti ishte i parkuar pranë banesës me qira ku jeton prokurori.
Albert Kuliçi ka pasur në dorë dosje të nxehta.
Ai ka kërkuar burg për ish-kryebashkiakun e Vlorës , Shpëtim Gjikën, për koncesionin e parkimeve.
Aktualisht Kuliçi po heton privatizimin e pronave në bregdetin e Zvërnecit, ku ka kërkuar 28 vite burg për Pëllumb Petritajn, për “Falsifikim dokumentash” dhe “Pastrim parash”.
