Në gjashtë muajt e fundit, Policia e Shtetit ka evidentuar mijëra raste ndërtimesh të paligjshme dhe pushtimi të tokës, por vetëm një numër i vogël zyrtarësh janë proceduar për shpërdorim detyre. Juristët e cilësojnë këtë si mungesë serioziteti në zbatimin e ligjit.
Thuajse çdo ditë, kryeministri Edi Rama publikon video nga aksionet e Inspektoriatit të Mbrojtjes së Territorit (IMT) për çlirimin e hapësirave publike dhe trotuareve, të shoqëruara me mesazhe si “S’ka pushim” apo “Ecim pa ndalim”. Prej fillimit të korrikut, aksioni ka prishur mijëra ndërtime dhe tenda pa leje, por vetëm një pjesë e vogël e tyre është ndjekur me procese ligjore, ndërsa procedimet ndaj zyrtarëve lokalë mbeten minimale.
Të dhënat e Policisë së Shtetit, të siguruara nga BIRN, tregojnë se nga 1254 raste ndërtimesh të paligjshme të konstatuara nga 20 shkurti deri më 20 gusht, vetëm 378 lidhen me aksionin për hapësirat publike. Për pushtimin e tokës janë regjistruar 324 raste, prej të cilave 182 vetëm në muajt korrik dhe gusht.
Në total, 1305 persona janë proceduar penalisht, 36 janë arrestuar dhe 32 shpallur në kërkim. Gjatë periudhës korrik–20 gusht, janë proceduar 377 persona, me 21 të arrestuar dhe 14 në kërkim. Por, për shpërdorim detyre janë evidentuar vetëm tre raste, me tre të arrestuar dhe tre të proceduar në gjendje të lirë.
Vetëm një javë më parë, policia arrestoi një punonjës të IMT-së në Bashkinë e Tiranës dhe procedoi dy të tjerë, pasi akuzoheshin për marrje ryshfeti prej 100 mijë lekësh për të lejuar mbajtjen e tendave. Ndërkohë, më 3 shtator, Agjencia e Mbikëqyrjes Policore njoftoi arrestimin e një shtetasi për ndërtim të paligjshëm në një zonë të mbrojtur në Tropojë dhe procedimin e një punonjësi policie dhe një punonjësi të Agjencisë së Zonave të Mbrojtura për shpërdorim detyre.
Juristët theksojnë se këto shifra tregojnë një anashkalim të hapur të përgjegjësisë së institucioneve. “Zbatimi i ligjit me fushata dhe në mënyrë selektive është i rrezikshëm: i mungon qytetarit siguria juridike dhe zyrtarët mësohen t’i binden shefave, jo ligjit,” deklaroi për BIRN avokati Eugen Beçi.
Ai shtoi se, nëse nuk bëhet fjalë për propagandë, aksioni tregon “dështimin total të institucioneve që kontrollojnë territorin” dhe se lista e zyrtarëve të akuzuar për shpërdorim detyre duhet të ishte me qindra emra, jo vetëm disa individë. /BIRN
