Një aksident me vdekje ka ndodhur në aksin Korçë-Kapshticë, pasditen e djeshme. Në afërsi të fshatit Cangonj, një automjet tip “Benz” që drejtohej nga shtetasi Adi Koçileri, ka goditur një motoçikletë. Si pasojë e kësaj përplasjeje, ka humbur jetën drejtuesi i motorit, shtetasi me inicialet A. Sh., 77 vjeç.
Ndërsa ditën e sotme, Policia e Korçës ka arrestuar Adi Koçilerin. Sipas policisë, shtetasi A. K., 30 vjeç, banues në fshatin Hoçisht, Devoll, është arrestuar pasi mbrëmjen e djeshme, pranë kryqëzimit të fshatit Cangonj, Devoll, ky shtetas duke drejtuar mjetin tip “Benz”, është përplasur me mjetin motor tip “Piaggio”, pa targa, me drejtues shtetasin A. Sh., 77 vjeç, banues në fshatin Cangonj, Devoll.
Për pasojë, ky shtetas ka gjetur vdekjen e menjëhershme. Me drejtuesin e mjetit tip “Benz”, shtetasin A. K., policia e Korçës po kryen veprimet e mëtejshme procedurale.
Njoftimi i Policisë së Korçës:
“Më datë 24.08.2021, rreth orës 18:30, jemi njoftuar se në aksin rrugor Bilisht-Korçë, në afërsi të fshatit Cangonj, shtetasi A. K., 30 vjeç, duke drejtuar mjetin tip “Benz”, ka aksidentuar drejtuesin e një motoçiklete (ende i paidentifikuar) i cili për pasojë ka ndërruar jetë. Me drejtuesin e mjetit, shtetasin A. K., po kryhen veprimet e mëtejshme procedurale”, shkruhej në njoftimin e Policisë.
