Drejtori i Shërbimit kombëtar të hetuesisë, Borislav Sarafov ka treguar detaje të reja rreth aksidentit të autobusit ku mbetën të vdekur 45 persona nga Maqedonia e Veriut.
Ai ka pohuar se rezultatet e ADN-së të udhëtarëve do të dalin për dy ditë. Sarafov për dnes.bg ka konfirmuar informacionin se ka pasur shpërthim në autobus. Ai gjithashtu ka thënë se së bashku me kolegët nga Maqedonia e Veriut kanë përcaktuar drejtimin e hetimeve.
“Lista e udhëtarëve të autobusit i është dërguar autoriteteve të Maqedonisë dhe procesi i identifikimit ka filluar. Bullgaria pret nga Maqedonia që të dërgojë ekzemplarë të ADN-së nga familjarët e të aksidentuarve, që të lehtësohet identifikimi i të vdekurve dhe të lënduarve”.
Ai gjithashtu ka thënë se nuk ka evidencë se në autobus ka pasur lëndë djegëse apo naftë, siç është përmendur nga zyrtarë të tjerë lokal, njofton Telegrafi Maqedoni.
Sarafov ka shtuar se kanë kontaktuar me pronarin e agjencisë duke thënë se nga i njëjti do të kërkohet dokumentacioni i plotë për autobusët dhe për kompaninë.
Në fund Sarafov shprehu ngushëllimet e tij për familjarët e viktimave dhe iu uuroi shërim sa më të shpejtë të lënduarve.
Kujtojmë që të mbijetuarit nga aksidenti janë 7 persona, të cilët aktualisht ndodhen në spitalin spitalin “Pirogov”, fatmirësisht jashtë rrezikut për jetën.
