Një aksident tragjik ka ndodhur një ditë më parë në Bullgari me pasojë vdekjen e 45 personave, mes të cilëve 12 ishin fëmijë.
Shumica e viktimave janë 25 deri në 30 vjeç. Ndërkohë 7 persona të mbijetuar janë dërguar në spital për trajtim mjekësor.
Deri më tani shkaku i përplasjes nuk është konfirmuar, megjithatë dyshimet janë se autobusi goditi një trafik-ndarëse në autostradë dhe më pas mori flakë. Flakët nisën në pjesën e përparme të autobusit, duke u lënë kohë atyre që ishin ulur në sediljet e fundit të gjenin kohë për të shpëtuar. Në mesin e të mbijetuarve janë pesë shtetas të Maqedonisë së Veriut, një shtetas serb dhe një belg. Ata kanë pësuar djegie dhe lëndime në trup, por gjendja e tyre paraqitet stabël dhe jashtë rrezikut për jetën.
Mediat greke kanë shkruar mbi këtë ngjarje duke cituar një prej të mbijetuarve Lulzim Sulejmani, që ka treguar momentin e tmerrshëm të aksidentit. Sipas tij përplasja erdhi pasi shoferin e kishte zënë gjumi. Ndër të tjera i mbijetuari tregon se si shpëtoi bashkë më të fejuarën e tij, duke thyer xhamin dhe duke u hedhur matanë.
“Shoferin e zuri gjumi. Autobusi u përplas me bordurën dhe më pas plasën gomat. Më pas ai u përfshi nga flakët. I gjithë autobusi ishte mbushur me tym. Theva xhamin dhe u hodha matanë bashkë me të fejuarën dhe disa persona të tjerë. Në autobus dëgjoheshin shumë britma. Pastaj nuk e di çfarë ndodhi pasi fillova të ec dhe u largova të paktën 200 metra nga autobusi. Unë isha katër ditë me të fejuarën time me pushime. Fëmija më i vogël mes nesh ishte 4 vjeç. Shkak i vetëm i aksidentit është përgjumja e shoferit. Po binte shi. E fejuara ime i është nënshtruar një operacioni pasi ka fraktura”, tha Lulzim Sulejmani, shqiptari nga Presheva, i cili bashkë me të fejuarën po udhëtonte nga Kumanova drejt Maqedonisë së Veriut.
Dy ditë më parë Sulejmani kishte postuar foto në rrjetet sociale bashkë me partneren e tij gjatë pushimeve në Stamboll. Zyrtarët bullgarë kanë deklaruar se do të jetë shumë e vështirë për të identifikuar shumicën e viktimave për shkak të djegies.
