Një aksident i rëndë ka ndodhur mbrëmjen e djeshme në fshatin Zëmblak, ku një goditje frontale ka çuar në vdekjen e menjëhershme të një 24-vjeçareje greke, pasagjere në mjetin tip “Peugeot”.
Sipas hetimeve të para, drejtuesi i “Peugeot”-it ka kryer një manovër të gabuar për të shmangur një kafshë dhe ka devijuar mjetin në korsinë tjetër, ku është përplasur kokë më kokë me një “Benz”.
Viktima, e identifikuar si shtetase greke, ishte duke kaluar festat e fundvitit në Shqipëri me të fejuarin e saj. Të dy të rinjtë ishin nga Selaniku dhe kishin ardhur në Shqipëri rreth datës 27 dhjetor.
Trupi i viktimës do të dërgohet në Institutin e Mjekësisë Ligjore në Tiranë për ekspertizën e nevojshme, pasi ajo është shtetase e huaj.
Policia vijon hetimet për të zbardhur plotësisht rrethanat e aksidentit dhe për të siguruar prova të mëtejshme lidhur me shkakun e tij.
