Një aksident i rëndë trafiku i ndodhur të dielën pasdite në Luksemburg i mori jetën pesë personave, mes tyre tre të rinj shqiptarë nga Kosova. Viktimat janë identifikuar si Edonik Kastrati, Ukë Bajraktaraj dhe Ujkan Bajraktaraj.
Ngjarja ndodhi rreth orës 17:00, sipas njoftimeve të familjarëve të viktimave përmes rrjeteve sociale. Një i afërm i tyre e ka konfirmuar lajmin, duke shprehur dhimbjen e thellë për humbjen e të rinjve.
“Me zemër të thyer ju njoftoj se dje rreth orës 17:00 në Luksemburg ndodhi një aksident ku humbën jetën tre të rinj – Uka dhe Ujkani, nipat e mi, si dhe Edonik Kastrati, djali i tezes. Allahu i mëshiroftë dhe i shpërbleftë me Xhenet,” ka shkruar ai.
Autoritetet luksemburgase nuk kanë dhënë ende informacion të plotë mbi rrethanat e aksidentit, ndërsa hetimet janë në vijim.
