Tetë persona humbën jetën dhe dhjetëra u plagosën, pasi një autobus pasagjerësh u përplas në shtyllën e një mbikalimi të autostradës pranë Budapestit herët të dielën tha policia hungareze.
Tetë persona u plagosën rëndë dhe 40 pësuan lëndime të lehta në aksident, për të cilin policia tha se ndodhi në orën 4.55 të mëngjesit rreth 70 km në jugperëndim të kryeqytetit. Të plagosurit u dërguan në spitalet në rajon dhe në Budapest.
Në një deklaratë, policia tha se shkaku i saktë i aksidenit nuk ishte ende i njohur dhe nuk kishte detaje aktualisht në lidhje me moshën ose identitetet e viktimave.
Sipas imazheve të postuara nga shërbimet e shpëtimit në Facebook, autobusi, i cili kishte një targë hungareze, doli nga rruga dhe u përmbys. Zjarrfikësit mbërritën menjëherë në vendngjarje për të shpëtuar udhëtarët e bllokuar në rrënojat.
“Ata po ktheheshin nga një udhëtim ditor në Kroaci”, tha një shofer në vendngjarje për faqen e internetit të lajmeve, Index.hu.
Në një mesazh në Facebook, ministrja e qeverisë Katalin Novak shprehu ngushëllimet e saj për familjet e viktimave.
Në një aksident të madh rrugor në Hungari në vitin 2003, 33 persona vdiqën kur një tren dhe një autobus që transportonte turistë gjermanë u përplasën në Siofok, një vendpushim popullor pushimesh në brigjet e Liqenit Balaton.
