Një aksident ka ndodhur mëngjesin e kësaj të premteje, rreth orës 06:30, në autostradën Rrogozhinë-Lushnje, në afërsi të fshatit Golem. Një automjet tip “Mercedez” me targa AA 334 RP dhe me drejtues shtetasin me iniciale K. B, ka humbur kontrollin dhe pasi ka kaluar barrierat e hekurta, ka përfunduar në kanalin anëssor të autostradës. Drejtuesi i automjetit në momentin e aksidentit udhëtonte bashkë me dy fëmijët e mitur, të cilët janë transportuar me urgjencë në spitalin e Lushnjes dhe ndodhen nën kujdesin e mjekëve. Policia dhe grupi hetimor janë në vendngjarje për të dokumentuar ngjarjen dhe shkaqe e aksidentit. Paraprakisht dyshohet se shkak është bërë lagështia në rrugë dhe shpejtësia e lartë. Pranë spitalit të Lushnjes mësohet se dy fëmijët dhe drejtuesi janë jashtë rrezikut për jetën.
