Shtatë turistë francezë kanë përfunduar në spitalin e Lushnjes pas një aksidenti që ndodhi teksa udhëtonin në drejtim të Beratit. Furgoni i linjës Tiranë-Berat, me të cilin ata po udhëtonin, u përplas me një autokombajnë që po lëvizte nga njëri krah i rrugës në tjetrin.
Aksidenti ndodhi në segmentin rrugor nacional Lushnje-Berat, një zonë e njohur për rrezikun e lartë të aksidenteve për shkak të vetëm dy korsive vajtje-ardhje dhe trafikut të dendur të mjeteve bujqësore. Policia ka mbërritur menjëherë në vendngjarje, ka ndaluar drejtuesit e mjeteve të përfshirë në aksident dhe po disiplinon trafikun, ndërkohë që dokumenton ngjarjen që mund të kishte përfunduar tragjikisht.
Të aksidentuarit janë duke marrë ndihmë mjekësore në spitalin e Lushnjes. Sipas burimeve mjekësore, disa prej turistëve kanë pësuar thyerje gjymtyrësh dhe dëmtime të tjera në trup. Fatmirësisht, nuk ka probleme serioze për shëndetin e tyre dhe po kryhen ekzaminimet përkatëse për të siguruar trajtimin e duhur.
Policia ka nisur hetimet për të përcaktuar shkaqet e aksidentit, ndërsa segmenti rrugor Lushnje-Berat mbetet një pikë e nxehtë për aksidente për shkak të infrastrukturës së saj dhe kalimit të shpeshtë të mjeteve bujqësore nga njëra anë e rrugës në tjetrën.
