Një aksident tragjik ka ndodhur pasditen e 4 korrikut në fshatin Kryebushat të Shkodrës, ku një person ka humbur jetën dhe tre të tjerë, përfshirë dy fëmijë, janë plagosur.
Viktima është Gjin Bzhangaj, 37 vjeç, i cili po udhëtonte me familjen në aksin Shkodër–Lezhë, kur makina e tij u përfshi në një përplasje të trefishtë.
Ngjarja ndodhi rreth orës 14:50 dhe, sipas Policisë së Shkodrës, shkak u bë humbja e kontrollit nga drejtuesi i një kamioni, 42-vjeçari T.K. Ky i fundit u përplas fillimisht me një mjet tip furgon, drejtuar nga 63-vjeçari A.S., dhe më pas me makinën ku ndodhej familja Bzhangaj.
Përplasja rezultoi fatale për Gjin Bzhangajn, i cili ndërroi jetë në Spitalin Rajonal të Shkodrës si pasojë e plagëve të marra.
Ndërkohë, bashkëshortja e tij, 32-vjeçarja J.B., dhe dy fëmijët e mitur, që udhëtonin me të, mbetën të plagosur por janë jashtë rrezikut për jetën.
Pamjet nga vendngjarja tregojnë automjetin e familjes së viktimës të shkatërruar thuajse plotësisht, ndërsa kamioni që shkaktoi aksidentin kishte mbetur në mes të rrugës, me dëmtime të konsiderueshme.
Policia Rrugore dhe grupi hetimor ndodhen në vendin e ngjarjes dhe po punojnë për të përcaktuar shkaqet e aksidentit dhe për të vlerësuar përgjegjësitë e secilit prej drejtuesve të përfshirë.
Shoferi i kamionit është marrë në pyetje dhe po hetohet në lidhje me shkeljet e mundshme që çuan në këtë ngjarje të rëndë.
