Një familje nga Kosova është përfshirë në një aksident rrugor mëngjesin e së martës në aksin “Shëngjin–Velipojë”, në afërsi të fshatit Rrjoll.
Sipas informacioneve nga policia, dyshohet se drejtuesi i mjetit, shtetasi J.B., ka humbur kontrollin e automjetit, i cili ka dalë nga rruga dhe është përplasur me një dyqan buzë saj.
Si pasojë e aksidentit janë plagosur katër persona drejtuesi i mjetit dhe tre pasagjerë, të gjithë anëtarë të së njëjtës familje. Të lënduarit janë transportuar menjëherë në spital, ku ndodhen jashtë rrezikut për jetën.
Njoftimi i policisë
Shkodër/Informacion paraprak
Rreth orës 07:10, në aksin rrugor “Shëngjin-Velipojë”, në fshatin Rrjoll, shtetasi kosovar J. B., duke drejtuar automjetin, dyshohet se ka humbur kontrollin dhe si pasojë automjeti ka dalë nga rruga dhe është përplasur me një dyqan.
Nga aksidenti janë dëmtuar drejtuesi i automjetit, shtetasi J. B., dhe 3 pasagjerë (familjarë të tij), të cilët janë dërguar për mjekim, në spital, dhe janë jashtë rrezikut për jetën.Grupi hetimor po punon për zbardhjen e rrethanave të aksidentit.
