Një aksident i rëndë ka ndodhur mbrëmjën e djeshme rreth orës 22:50 në aksin rrugor Korçë-Maliq. Policia e Korçës ka dalë sot me një njoftim zyrtar ku bën me dije se ngjarja tragjike ka ndodhur në afërsi të fashatit Çiflig në Korçë. Një automjet policie tip “Ford” ka aksidentuar një këmbësor rreth 45 vjeç i cili për pasojë ka ndërruar jetë. Identiteti i viktimës nuk është bërë ende i ditur, ndërsa policia njofton se grupi hetimor është duke bashkëpunuar me Shërbimin për Çështjet e Brendshme dhe Ankesat dhe nën drejtimin e Prokurorisë së Korçës janë duke u kryer hetimet për zbardhjen e rrethanave të plota të ngjarjes. Nuk dihet ende as identiteti i shtetasit që drejtonte automjetin e policisë dhe nëse është bërë shoqërimi i tij në komisariat për veprime të mëtejshme hetimore.
Njoftimi i plotë i policisë:
Korçë/ Informacion paraprak
Më datë 22.04.2021, rreth orës 22:50, në aksin rrugor Korçë-Maliq, pranë fshatit Çiflig, Korçë, automjeti i policisë tip “Ford”, ka aksidentuar një këmbësor rreth 45 vjeç, ende i paidentifikuar, i cili për pasojë ka ndërruar jetë.
Grupi hetimor në bashkëpunim me Shërbimin për Çështjet e Brendshme dhe Ankesat, nën drejtimin e Prokurorisë Korçë, po kryejnë veprimet hetimore për zbardhjen e plotë të rrethanave të ngjarjes.
