Ish-zv.kryeministri Arben Ahmetaj ka hedhur akuza të rënda ndaj qeverisë së Edi Rama, duke deklaruar se shqiptarët ende nuk kanë parë skemën më të madhe të grabitjes së pasurisë publike, të cilën ai e cilëson si “5 ER” ose “5 Edi Rama”.
Duke folur në emisionin “Çim Peka LIVE”, Ahmetaj u shpreh se pas asaj që është njohur publikisht si “5D”, po del në dritë një skemë shumë më e gjerë dhe më e rrezikshme. Sipas tij, “5 ER” përfaqëson një mekanizëm të organizuar shtetëror për ndarjen e Shqipërisë mes një grupi të vogël oligarkësh.
“Unë nis me variantin 5D. Jeni duke parë variantin 5 ER. Është varianti 5 ER i plaçkitjes së Shqipërisë”, deklaroi Ahmetaj, duke shtuar se qytetarët duhet të marrin hartën e vendit dhe të shohin se ku nuk ka mbetur asnjë copë pa u dhënë.
Në qendër të kësaj skeme, sipas Ahmetajt, qëndron sekretari i Përgjithshëm i Këshillit të Ministrave, Engjëll Agaçi, të cilin ai e cilësoi hapur si koordinatorin e korrupsionit në qeveri.
Gjatë debatit, gazetari Çim Peka e pyeti nëse Agaçi ishte emri i katërt në këtë skemë. Ahmetaj u përgjigj se gjithçka do të sqarohej me radhë, duke lënë të kuptohet se lista është e gjatë dhe e strukturuar.
“Po neni i llogarisë në Itali, unë nuk e bëj dot ta përmend, sepse i kam thënë të gjitha, edhe ai Rama i ka pranuar të gjitha”, u shpreh Ahmetaj. Ai shtoi se kryeministri ka pranuar kontakte, takime dhe ndërmjetësime, si dhe ekzistencën e mesazheve ku sipas tij jepen urdhra të drejtpërdrejtë: “jepja këtij, jepja atij, bëja këtij, bëja atij”.
Ahmetaj u ndal edhe te drejtësia, duke përmendur drejtuesin e SPAK, Altin Dumani. Ai deklaroi se dëmi i ndodhur gjatë periudhës së drejtimit të tij arrin në shifra kolosale, duke e vlerësuar atë në 14 deri në 15 miliardë.
“Tani do shohim çfarë do ndodhi”, tha Ahmetaj, duke shtuar se sipas tij vëmendja po devijohet qëllimisht te persona të caktuar, ndërsa thelbi i grabitjes mbetet i paprekur.
Në këtë kontekst, ai përmendi edhe AKSHI, të cilën e cilësoi si “maja e ajsbergut”. Sipas Ahmetajt, çdo dosje që del në publik është vetëm një fragment i një strukture shumë më të madhe korrupsioni që ka ndërtuar kjo qeveri.
“Po çfarë ajsbergu ka krijuar kjo qeveri, ky kryeministër? Se për çdo dosje është maja e ajsbergut”, theksoi ai.
Ahmetaj akuzoi gjithashtu një grup prej 15 apo 16 oligarkësh dhe aksionerësh, të cilët sipas tij janë “enablers”, pra lehtësuesit dhe përfituesit kryesorë të grabitjes së pasurisë publike. Ai deklaroi se këta aktorë, të mbështetur nga media të lidhura me ta, kanë funksionuar me logjikën e mosndëshkimit dhe të përçmimit ndaj qytetarëve.
“Shteti u është dhënë me hartë përpara. I ke aty, 15-16 me kokrra janë”, u shpreh Ahmetaj, duke shtuar se kjo skemë nuk mund të fshihet më dhe se sipas tij po vjen momenti që institucionet të merren jo vetëm me figurat publike, por edhe me aksionerët dhe përfituesit realë të kësaj grabitjeje.
Deklaratat e Ahmetajt pritet të shkaktojnë reagime të forta politike, ndërsa akuzat për skemën “5 ER” shtojnë presionin mbi qeverinë dhe institucionet e drejtësisë për hetime të thelluara.
