Agron Shehaj e ka pranuar për herë të parë publikisht që marrëdhëniet e tij me kryetarin aktual të PD-së, Lulzim Bashën janë ftohur. Këto deklarata Shehaj i ka bërë i ftuar në emisionin “Zonë e lirë”, ndërsa ka shtuar se ftohja nuk ka të bëjë vetëm me kandidimin e tij për kryetar të PD-së. Shehaj tha se ftohja ka ardhur edhe si pasojë e strategjisë elektorale. Ai tha se largimi nga Parlamenti i ka prishur shumë punë demokratëve dhe ishte një vendim me pasoja shumë të rënda.
“Po. Është e vërtetë. Por kjo nuk do të thotë se unë kisha vendosur të konkurroja. Ftohja ka ndodhur. Mendoja se ftohja ikte. Ftohja ka pasur të bëjë edhe me strategjinë elektorale. Largimi nga parlamenti na ka prishur shumë punë. Ishte një vendim shumë i rëndë, me pasoja shumë të rënda për PD-në”, tha Shehaj.
I pyetur nëse i ka borxh Bashës për afrimin në PD, Shehaj tha: “Borxh u kam demokratëve dhe shqiptarëve”.
Ai foli edhe për rivalin e tij në garën për PD, Fatbardh Kadillin. Shehaj tha se “Bardhi (Kadilli) burrë shumë i mirë. Nuk kemi të njëjtat ide”.
Zgjedhjet brenda Partisë Demokratike do të mbahen në 13 qershor. Në garë janë kreu aktual, Lulzim Basha, Fatbardh Kadilli, Edith Harxhi dhe Agron Shehaj.
