Ditën e djeshme u mbajt seancë plenare maratonë e cila u nda në tre pjesë. Deputeti i Partisë Demokratike, Agron Gjekmarkaj në një intervistë për “Syri.Tv” ka sqaruar edhe arsyen se përse qeshën deputetët, në momentin që Sajmir Korreshi deputeti demokrat i Lushnjes mbajti fjalimin.
Gjekmarkaj u justifikua me faktin se nuk ishte një e qeshur tallëse apo dashakeqëse kundrejt deputetit, por sipas tij ishte njjë e qeshur kënaqësie pasi fjalimi u pëlqeu të gjithëve.
“Ka dy të qeshura, një e qeshur se diçka të pëlqen dhe një e qeshur, kur do ta tallësh ta përqeshësh një gjë. Dhe fjalimi në rastin e zotit Korreshi ishte një e qeshur kënaqësie, sepse na pëlqeu të gjithëve ajo që ai tha me një sens të fortë humori dhe ishte e pamundur ti rezistoje të qeshurës. Nuk ishte përçmuese. Përçmuese ishte e qeshura që na kapi më vonë, kur folën ministrat e qeverisë”, u shpreh Agron Gjekmarkaj.
Gjatë fjalës së mbajtur në Kuvend në orët e para të mëngjesit deputeti i Lushnjes, Saimir Korreshi u shpreh si më poshtë.
“Këtu u tha se këtu kemi bërë shëndetësinë jashtëtoksore. Po hajde njëherë në spitalin e Lushnjës, të del miu nga këmbët e nuk din ku të vesh. Ju jetoni në ëndrra. Thoni se do bëni shkolla por nuk kemi më nxënës se të gjithë fëmijët kanë ikur”, tha Korreshi në Kuvend.
