Gjykata e Lartë ka pranuar zyrtarisht kërkesën e ish-Prokurorit të Përgjithshëm, Adriatik Llalla, për të tërhequr rekursin kundër vendimit penal që e dënon me dy vite burg dhe pesë vite përjashtim nga funksionet publike.
Me këtë vendim, mbetet në fuqi dënimi i dhënë nga Gjykata e Posaçme Antikorrupsion, që e shpalli fajtor për fshehje të pasurisë. Vendimi është marrë më 20 maj 2021 nga gjyqtarja Daniela Shirka, pas hetimeve të zhvilluara nga prokurori Klodian Braho.
Llalla, i cili është shpallur në kërkim ndërkombëtar, kishte paraqitur fillimisht një rekurs në Gjykatën e Lartë, duke kërkuar pafajësi. Megjithatë, ai vendosi të heqë dorë nga kjo kërkesë, edhe pse vazhdon të jetë jashtë vendit.
Pavarësisht statusit të tij si i shpallur në kërkim, Adriatik Llalla është shfaqur publikisht më 9 shkurt 2025 në një takim të organizuar nga kreu i PD-së, Sali Berisha, me diasporën shqiptare në Romë. Prania e tij në këtë aktivitet shkaktoi reagime të shumta, pasi autoritetet shqiptare e konsiderojnë ende si të arratisur.
Në kuadër të çështjes penale, gjykata ka vendosur konfiskimin e disa prej pasurive të tij, përfshirë një apartament në Durrës dhe sipërfaqe toke në periferi të Tiranës.
Më herët, Gjykata e Lartë kishte refuzuar një kërkesë të Llallës për pezullimin e dënimit, me pretendimin se vuante nga një sëmundje e rëndë, duke e konsideruar atë të pabazuar në prova bindëse.
