Kosova ka marrë një vendim drastik për gjendjen e krijuar nëse deri të shtunën nuk votohet buxheti.
Prej ditës së nesërme qeveria mbyllet duke ndjekur shembullin e Amerikës dhe duke pezulluar kështu të gjitha pagesat, përveç borxheve publike.
Pagat e sektorit publik janë shpërndarë që ditën e sotme dhe duke filluar që prej ditës së nesërme çdo cent do të jetë i bllokuar. Nuk ka një afat sesa mund të zgjasë si gjendje, mund të zgjasë vetëm 24 orë, por mund të ndodhë që të kthehet edhe në të përhershme për shkak të gjendjes kaotike të krijuar nga grevat.
Për t’i ikur asaj që quhet “mbyllje e qeverisë”, e cila hyn në fuqi që nga nesër, Qeveria e Kosovës është ngutur që t’i paguajë pagat e punëtorëve me datën 31 janar. Ekspertët financiarë, por edhe përfaqësuesit e opozitës, po e paralajmërojnë qeverinë që tani ajo nuk ka të drejtë të shfrytëzojë mjetet financiare, pa u aprovuar buxheti në lexim të dytë.
Me vendim të Kuvendit, mund të bëhet zgjatja e Ligjit për Ndarjet Buxhetore për tre muajt e parë të vitit të ri, por në asnjë mënyrë më shumë se kaq.
Ekonomisti Hekuran Murati ka paralajmëruar se nga 1 shkurti Kosova hyn në një fazë që ngjan me “shutdoën” amerikan, ku vendi përjeton mbyllje financiare.
Ai ka thënë për Gazetën Express se nuk mund të shpenzohet asgjë deri në hyrjen në fuqi të buxhetit të ri.
“Prej datës 1 shkurt e tutje, Qeveria nuk guxon me e shpenzu asnjë cent të vetëm – rryma, telefoni, furnizimi me material të zyrës, pagat, pensionet, e shumë shërbime e fatura të tjera nuk do të mund të paguhen”, thotë Murati.
Deputeti i LDK’së, Lumir Abdixhiku, i cili udhëheq komisionin parlamentar për të Financave, thotë se në një situatë të tillë të mbylljes financiare, Qeveria e humb kontrollin mbi paranë publike.
“Qeveria e Kosovës nuk ka të drejtë të shpenzojë e alokojë mjete financiare nga buxheti për asnjë aktivitet publik. Në një skenar të tillë, Qeveria e humbë të drejtën e kontrollit mbi kuletën e shtetit”, ka thënë Abdixhiku.
Humbja e kontrollit mbi “kuletën e shtetit”, Abdixhiku thotë se duhet ta çojë në shtëpi Qeverinë, që humb aftësinë e marrjes së vendimeve,.
“Ne aspektin moral e politik, një qeveri që nuk ka kontroll financiar mbi kuletën e vet, nuk ka kontroll as mbi shumicën e as mbi vendimmarrjen në vend. Pra e njëjta s’mund te marre vendime, s’mund te udhëheqë me administrate publike, e s’mund te veprojë si shtet. Prandaj ajo është e detyruar të dorehiqet”, thotë deputeti i LDK’së.
