Kryeministri Edi Rama ka folur ditën e sotme nga foltorja e Kuvendit lidhur me abuzimin e 15-vjeçares në Babrru nga roja e shkollës, 65-vjeçari Abaz Doka.
Rama tha se kjo nuk është hera e parë që një krim i tillë ndodh në vendin tonë, duke marrë kështu në mbrojtje ministren e Arsimit, Besa Shahinin.
Kjo e fundit ka reaguar për herë të parë ditën e djeshme dhe për herë të dytë ka reaguar ditën e sotme, pak orë më parë.
“Çfarë duan këta që ministrja të dalë dhe të flasë për rastin në publik, apo të dalë dhe të marrë masat siç duhet”, është shprehur Rama duke i dalë krah ministres Shahini, duke e justifikuar për vonesën e reagimit të saj.
“Nuk është hera e parë që ndodh për fatin tonë të keq, u kalua në abuzim që nuk është në nivelin e abuzimit trupor, por është në dhunimin e nivelit psikologjik të një trupi të tërë.
Janë deputete, janë analistë, e marrin viktimën dhe e bëjnë mish për topat e tyre, është një gjë që nuk ndodh në asnjë vend të botës.
Atë viktimë që gjënë më të rëndësishme dhe kërkesën themelore që kanë është ti ruhet anonimiteti.
Pseudopolitikë, pseudonjerëzor, është fatkeqësi që të shohësh sesi një viktimë e dhunës ndaj një të miture përdoret në këtë farëfeje.
Unë nuk vë në dyshim që një pjesë e këtyre njerëzve të kenë ndjerë vërtet keqardhje, u them të gjithëve atyre që e kanë kthyer víktimën në shkop për tiu rënë të tjerëve, që ju jeni ridhunues të asaj fatkeqe, dhe nga ana tjetër unë nuk besoj një sekondë të vetme, që ata që dhunojnë publikisht ministren, që është një grua, e kanë hallin e vërtetë te ajo vajzë.
Nuk mund të mbrosh një víktimë, duke sulmuar një grua tjetër.
Kisha Katolike ka prej vitesh që ka hyrë në një përballje me pedofilinë, kardinalë, peshkopë të të gjitha nivelet, janë të përfshirë në skandale seksuale, dhe kjo gjë që e ka goditur në mënyrë shumë të egër vetë Kishën, nuk ka qenë një arsye për të rrënuar vetë Kishën.
Këtu viktima është marrë dhe është bërë paçavure, është bërë poster, dhe jam i sigurt që asnjë nga këta që flasin nuk ka shkuar që ta takojë atë vajzë.
Çfarë duan këta që ministrja të dalë dhe të flasë për rastin në publik, apo të dalë dhe të marrë masat siç duhet.
Abuzuesit e këtyre viktimave janë prindërit, njerëz shumë të afërt me ta, apo siç janë mësuesit e tyre, siç janë priftërinjtë që ti shkon dhe fal mëkatet, prandaj këto krime janë shumë të vështira për tu kapur”, u shpreh kryeministri Rama nga foltorja.
