Gjykata Posaçme kundër Korrupsionit dhe Krimit të Organizuar ka vendosur masën e sigurisë ‘Arrest me burg’ për kryebashkiakun e Bulqizës Lefter Alla. Alla akuzohet për shpërdorim detyre dhe shkelje të barazisë në tendera. Së bashku me Allën është marrë vendimi dhe për 12 të pandehurit e tjerë që ndodheshin. Nga ata 9 janë lënë në arrest me burg, ndërsa 2 janë lënë në arrest shtëpie. Një nga të pandehurit, Leonard Daçi u paraqit në seancë me vonesë. I shoqëruar nga avokati ai tha se është një nga të pandehurit dhe do dalë për vlerësim mase në një moment tjetër.
Ndërsa Alla, u ankua për procesin e nisur ndaj tij duke u shprehur para togave të zeza se: Në gjykimin tim më mirë të më thonin ‘hap krahun’, se sa të bëhen këto gjyqe politike!
Lefter Alla – Kryetar i Bashkisë Bulqizë
Enkeleda Lleshi – Zv/kryetare
Erion Isaku – Drejtor i Urbanistikës
Kujtim Zogu – Drejtor i Mbrojtjes Civile
Rubin Kola – Inxhinier urbanistike
Denis Xholi – Ish Drejtor Juridik
Arsen Gjoka – Drejtor i NJVKSH Bulqizë
Po ashtu edhe administratorët e firmave fituese të tenderit nga të cilët do të qëndrojnë në burg:
Aqif Konesha (i afërm i kryebashkiakut Lefter Alla)
Rasim Daçi
Dalo Gazidedja
Në arrest shtëpie:
Ana Nishku (arrest shtëpie)
Kastriot Ibrahimi (arrest shtëpie)
Alla përfundoi në pranga pasi Prokuroria e Posaçme zbuloi kontaktet dhe komunikimet me biznesmenin Aqif Konesha i kompanisë që kryente punimet për ujësjellësin e Bulqizës. Madje, Alla, në shoqëri të Koneshës ka udhëtuar jashtë vendit me makinë, dyshohet në drejtim të Maqedonisë së Veriut. Gjatë kohës që diskutohej për tenderin, zëvendëskryetarja e bashkisë Bulqizë, Enkeleda Lleshi, kishte dhënë dorëheqje nga detyra pasi nuk donte të bëhej palë në firmosjen e tenderëve, por në gjykatë sot tha se largimi ng apuna ka ardhur për shkak të fluksit të madh.
“Kam zbatuar ligjin, nuk kam shkelur asnjëherë detyrën. Kam dhënë dorëheqjen nga nënkryetare dhe punoj në një drejtori në bashki. Nuk e përballoja dot volumin e madh të punës,“- tha Lleshi.
Në përfundim të seancës në GJKKO, Hysni Demiraj, avokati i kryebashkiakut të Bulqizës Lefter Alla ka folur para mediave duke mbajtur të njëjtin qëndrim se është sulm politik. Sipas Demirajt, është bërë se nuk pranoi të hiqte dorë nga gara në zgjedhjet e 14 majit.
“Është fillimi i procedimit. Prokuroria shqiptare dhe gjykata nuk kanë arrestuar vetëm rojën dhe pastruesen e bashkisë. Ne juristët duhet të jemi më të matur. Ai bëri gabim që i kushtoi shumë shtrenjtë se duhet të ishte më i zgjuar e duhet të kishte pranuar atë moskandidim. Ne do ndjekim rrugën ligjore, do ankohemi në panel. Skandali më i madh kur akuzohet për 2 akuza.
Nëse një zyrtar mund të ketë kryer shkelje të barazisë së tenderave, s’mund të akuzohet për shpërdorim detyre. Të akuzosh për 2 vepra penale më duket e padrejtë vetëm të bësh bujë, megjithatë sistemi është treshkallësh. Fillimi sa ka nisur. Ne s’kemi në dorë asnjë provë. Ne kemi pasur 2 netë në dispozicion. Ky është sistemi. S’jemi për të shajtur sistemin por për të mbrojtur Lefter Allën. Lefter Alla para marrjes së detyrave në bashki ka qenë biznesmen i suksesshëm. Ju garantoj që nuk ka ndërhyrë në një tender me 3 milionë euro. Edhe në Bulqizë ka jetë por ai popull nëse është pa bukë, le të mbesin edhe pa atë kanal, le të mbesin edhe pa ujë. 90% e punimeve janë të kryera. Nuk ka hetuar fare prokuroria se si është problemi në terren. Megjithatë të mos paragjykojmë, vijojmë hetimet,”- tha Demiraj.
Dy ditë më parë, Lefter Alla, kryetar i Bashkisë së Bulqizës u vu në prangat e Policisë së Shtetit. Alla është vënë në pranga me urdhër të SPAK për shkak se ndaj tij rëndojnë dy akuza, atë për korrupsion dhe abuzim me tenderat publikë. Bashkë me Allën është vënë në pranga dhe nënkryetarja Enkelejda Lleshi dhe 11 të tjerë që janë identifikuar si: Rubin Kola, Erion Isaku, Leonard Daci, Arsen Gjoka, Kujtim Zogu, Denis Xholi, Rasim Daci, Dalo Gazidedja Aqif Konesha, Kastriot Ibrahimaj, Ana Nishku.
Këta persona në bashkëpunim me njëri-tjetrin dyshohet se kanë kryer veprime të paligjshme në dhënien e një tenderi me vlerë 3 milionë euro për ndërtimin e një Ujësjellësi në qytetin e Bulqizës. Tenderi i bashkisë drejtuar nga Alla, u fitua nga një kompani BOE England e cila mendohet se u favorizua gjatë procedurës. Por punimet, u kryen nga një tjetër kompani, OE 2AF Albania shpk, lidhje shoqërore e kryetarit të Bashkisë.
