Autoriteti i Konkurrencës ka mbledhur prova se ndërmarrjet Erzeni SHPK, Gjirofarma SHA, ADG SHPK (Lufra), dhe SHAKA Boboshticë SHPK, të përfshira në prodhimin dhe tregtimin me shumicë të nënprodukteve të qumështit, kanë praktikuar abuzime në lidhje me çmimet. Si rezultat, është vendosur të zhvillohet një hetim i detajuar ndaj tyre.
Në mbledhjen e tij më datë 29.12.2023, Komisioni i Konkurrencës ka shqyrtuar procedurën hetimore ndaj këtyre ndërmarrjeve në tregun e prodhimit dhe tregtimit me shumicë të nënprodukteve të qumështit, duke analizuar sjelljen e tyre në këtë segment tregu. Rezulton se Erzeni SHPK, Gjirofarma SHA, ADG SHPK (Lufra), dhe SHAKA Boboshticë SHPK, me një pjesë të konsiderueshme të tregut, mund të kenë shkelur nenin 9 të ligjit nr. 9121/2003, duke kryer abuzim me pozitën dominuese.
Bazuar në këto gjetje, Komisioni i Konkurrencës, me Vendimin nr. 1045, datë 29.12.2023, ka vendosur të hapë një procedurë hetimore të thelluar ndaj Erzeni SHPK, Gjirofarma SHA, ADG SHPK (Lufra), dhe SHAKA Boboshticë SHPK, në periudhën nga 1 janar 2022 deri më 31 dhjetor 2023, në lidhje me prodhimin dhe tregtimin me shumicë të nënprodukteve të qumështit.
