Ambasadori i Mbretërisë së Bashkuar, Nicholas Abbott, ka komentuar mbi procesin e shpalljes “non grata” të disa personave, përfshirë edhe kreun e Partisë Demokratike, Sali Berisha.
Në një intervistë për gazetarin Blendi Fevziu, Abbott theksoi se këto janë procese ligjore dhe jo politike.
“Mbretëria e Bashkuar, ashtu si çdo shtet tjetër, synon të mbrojë sigurinë dhe të sigurojë sundimin e ligjit. Këto vendime merren në bazë të kushteve dhe procedurave ligjore që ndiqen rreptësisht,” tha ai.
I pyetur për arsyet e përfshirjes së Berishës në këtë listë, Abbott u përgjigj:
“Ne nuk komentojmë mbi çështje individuale. Këto nuk janë procese që targetojnë një individ të caktuar apo një vend specifik. Është një proces i bazuar në shqetësime të qarta dhe rregulla ligjore.”
Ambasadori gjithashtu sqaroi se nuk ka një “listë sekrete” siç pretendohet, duke theksuar se këto janë vendime të bazuara në shqetësime konkrete dhe jo në politika selektive.
