Prej javësh e gjithë bota është në ankth nga i ashtuquajturi “Coronavirus”.
Deri më tani kanë humbur jetën mbi 360 persona dhe janë prekur mbi 17,000 të tjerë në të gjithë botën.
Por, sa rrezikohet vendi ynë të preket nga Coronavirusi?
Ditën e sotme, Raul Gonzales Montero, drejtor i OBSH për Shqipërinë ka dhënë një intervistë për Euro News.
Ai qetësoi shqiptarët duke thënë se rreziku është i ulët dhe se nuk ka vend për panik.
Po ashtu, Montero përgëzoi punën e Ministrisë së Shëndetësisë, duke thënë se ka bërë një punë të përkryer.
Ai konfirmoi edhe një herë faktin se në Shqipëri nuk ka deri më tani asnjë rast të konfirmuar me virusin vdekjeprurës.
Sipas përfaqësuesit të OBSH nga vëzhgimet e deritanishme rezulton se shkalla e fatalitetit nga ky virus është 2-2,5 për qind.
“Ka dy institute, ai i Shëndetit Publik, që ka shumë aftësi, ka kapacitet, punonjësit, vullnetin dhe dijen për implementimin e masave mbrojtëse. Kemi edhe lidershipin e ministrisë së Shëndetësisë që i bëjnë gjërat me korrektësi gjithmonë, në koordinim me OBSH-në dhe duke ndjekur të gjitha masat e rekomanduara. Pra, jam shumë besimplotë me udhëheqjen e krizës aktuale nga ministria e Shëndetësisë.
Sipas shifrave tonë aktuale është mes 2 dhe 2.5 %. Por këto mund të ndryshojnë në ditët në vijim, pasi numrat nuk janë determinues pasi ndryshojnë. Por sipas të dhënave që kemi deri më tani, është përafërsisht 2 për qind. Kjo është ajo që ne quajmë shkalla e fatalitetit. Ata që janë të prekur janë persona me probleme të hershme shëndetësore. Pacientët që trajtohen për kancer për shembull, të cilët përdorin medikamente që dobësojnë imunitetin e tyre. Apo njerëz në moshë që për arsye natyrale janë dobësuar. Kjo është kategoria më vulnerabël. Ky grup që sistemi i tyre mbrojtës është i kompromentuar”, – tha z. Gonzales.
Megjithatë, ai ka bërë thirrje që qytetarët të tregojnë kujdes.
Për më shumë këshilla se si të mbrohemi nga Coronavirusi lexoni artikullin më poshtë:
Si të mbrohemi nga Coronavirusi? Ja çfarë këshillon Instituti i Shëndetit Publik
