Deklaratat e Tahirit pas daljes nga seanca tetë orëshe në Gjykatën e Krimeve të Rënda kanë qenë relativisht të forta dhe me mesazhe të thella, mirëpo një pyetje ka bërë që të ngrihen disa dyshime të reja.
Tahiri i pyetur nëse ndihej i bërë kurban, ka thënë se nuk është kollaj të jetë ai kurbani duke lënë këtu të nënkuptohen shumë gjëra. Pra do të kemi emra të tjerë të përfshirë në çështjen e tij?
Kjo mbetet për t’i parë megjithatë pavarësisht gjithçkaje, ish-ministri ka thënë se sido që të jetë, prapë ai do jetë “ministri kampion” dhe për gjithë çfarë ka bërë me Policinë e Shtetit, nuk pendohet, përkundrazi.
Pjesë nga intervista
A ndiheni i bërë kurban për hallet e politikës?
Nuk e ndiej veten asgjë nga këto që thatë. Di vetëm të them që drejtësia iu ka shumë borxhe njerëzve. Di të them që në këtë vend në 25 vjet kanë qeverisur njerëz që kanë vjedhur dhe kanë vrarë. Unë nuk kam vjedhur kërrkënd. Nuk ka një qytetar që të thotë më ke futur dorën në xhep. Nuk kam vrarë kërrkënd, çdo kusur që po përjetoj tani, do ia dal deri në fund dhe sigurisht që as më shqetëson shumë. Pastaj komentet nëse jam unë kurbani apo jo, kjo nuk është dhe aq e kollajtë të jem unë, kështu që nuk më shqetëson.
A keni pengje për mënyrën se si keni vepruar si ministër i brendshëm për 4 vite? Sepse nga një ministër kampion jeni një i pandehur zyrtar…
Ky s’mund të jetë momenti kur unë të rrëfej jetën time. Jo unë jam prapë ministër kampion të jesh e bindur. Atë që kam bërë për policinë e shtetit nuk i kthehem kurrë mbrapa.
