Pasi në Britani u zbulua varianti i ri i koronavirusit, Shqipëria i pezulloi fluturimet me Britaninë. Mirëpo a ka ardhur në Shqipëri varianti i ri më i transmetueshëm i covid-19?
Eugena Tomini, shefja e ISHP-së e ftuar mbrëmjen e sotme në një emision televiziv, u shpreh se deri tani nuk është evidentuar asnjë rast i variantit të ri të covid-19.
“Deri tani nuk është dedektuar asnjë monstër apo nëpërmjet diagnozës së PCR-së, e dyshimtë për kundrejt virusit covid-19. Nëse do të kishim dyshime, monstra transportohet në Berlin dhe Londër, ky është binjakëzimi i laboratorit të referencës.
Deri tani nuk ka rezultuar asnjë e dyshimtë, që është brenda linjës së koronaviruseve, por nuk konfigurohet si covid-19 dhe nëse do të shfaqet sigurisht bëhet dërgimi direkt në këto laboratorë referencë” deklaroi Tomini. Varianti i ri i koronavirusit është më infektues. Dy ditë më parë u zbuluan edhe 6 raste në Greqi.
Lloji i ri i koronavirusit të ri Covid-19 u zbulua edhe në Francë tek një person që ka pasur kontakt me Britaninë.
Në një deklaratë nga Instituti i Shëndetit Publik thuhet se lloji më ngjitës i COVID-19 u has në një francez i cili erdhi në Tours të Francës më 19 dhjetor nga Londra. Siç thuhet, megjithëse personi në fjalë nuk ka shfaqur simptoma, ai është karantinuar dhe kanë filluar hetimet për të identifikuar personat me të cilët ai mund të ketë pasur kontakt.
Siç theksohet, varianti i ri i virusit mund të haset edhe te persona të tjerë në vend që nga sot dhe se virusi ngjitet dhe depërton shpejt në qelizat e njeriut.
Departamenti i Shëndetësisë në Mbretërinë e Bashkuar kishte njoftuar zbulimin e një varianti të ri më infektues të COVID-19, gjë që ka bërë që shumë vende përfshirë dhe Turqinë, vendosën kufizime në udhëtimet me Britaninë./Gazetareforma.com/
